Соли 2025 барои таҳсил дар хориҷи кишвар ба ҷавонони тоҷик 170 стипендияи президентии “Дурахшандагон” пешниҳод гардид. Дар ин бора Тоҷиддини Баҳриддин, муовини директори Маркази барномаҳои байналмилалии Тоҷикистон ба “Азия-Плюс” иттилоъ дод.

Ӯ таъкид кард, ки ҳар сол шумораи довталабон барои таҳсил тариқи квотаи президентӣ афзоиш меёбад.

“Агар соли 2022 ҳамагӣ 73 квота пешниҳод шуда бошад, пас дар соли 2023 ин шумора ба 94 ва дар соли 2024 ба 130 адад расид”, - гуфт ӯ.

 

Ин чӣ гуна стипендия аст?

“Дурахшандагон” ба шаҳрвандони болаёқату боистеъдооди Тоҷикистон барои таҳсил ва коромӯзии мутахассисон дар муассисаҳои таълимӣ ва илмии давлатҳои хориҷӣ таъин карда мешавад. Он инфиродӣ буда, ҳамасола аз ҷониби Комиссияи ҷумҳуриявӣ оид ба интихоб ва тайёр намудани мутахассисон дар хориҷи кишвар муқаррар карда мешавад.

Номгӯи касбу ихтисосҳо заруриро барои ҷумҳурь Вазорати рушди иқтисод муайян мекунад. Стипендия аз ҳисоби Фонди махсуси президенти Тоҷикистон пардохт мешавад.

Қабули ҳуҷҷатҳо барои квотаи президентии “Дурахшандагон” аз моҳи ноябри соли 2024 оғоз шудааст. Довталабон тариқи ин барнома метавонанд дар зинаҳои гуногун, бакалавриат, магистратура, аспирантура ва докторантура таҳсил кунанд.

Довталабони тоҷик
акс аз Asia-Plus

Қаблан аз Маркази барномаҳои байналмилалӣ ба “Азия-Плюс” номгӯи ҳуҷҷатҳои лозимаро пешниҳод карда буданд, вале миқдори довталабони бо ин стипендия қабулшаванда ва номгӯи ихтисосҳо ҳанӯз маълум набуд.

 

Кадом ҳуҷҷатҳо лозим аст?

Ба иттилои намояндаи Маркази барномаҳои байналмилалӣ номгӯйи ҳуҷҷат барои донишгоҳҳои кишварҳои гуногун фарқ мекунад. Вале ин марказ барои сабук сохтани кори довталабон рӯйхати ҳуҷҷатҳои ягонаро тартиб додааст, ки ин феҳристро дар зер меорем:

- Нусхаи шиносномаи довталаб ва волидайн;

- Маълумотнома дар бораи доштан ё надоштани доғи судӣ;

- Маълумотномаи тиббӣ 038 (068);

- Маълумотномаи наркологӣ;

- Маълумотномаи ҳолати равонӣ (аз беморхонаи бемориҳои равонӣ);

- Маълумотнома дар бораи олуда набудан ба Вируси норасоии масъунияти одам (ВИЧ/СПИД);

- Тавсифномаи мақомот ё ташкилот (характеристика аз ҷойи таҳсил, кор ва ғайра);

- Ҳуҷҷати тасдиқкунандаи таҳсилот барои идомаи таҳсил аз рӯйи зинаи таҳсилоти интихобшуда (табели баҳо, аттестати таҳсили миёнаи пурра, диплом);

- Расид бо 120 сомонӣ аз “Амонатбонк”;

- Сертификат (IELTS, TOEFL, DUALINGO, GOETHE, H&C);

- 1 дона расми 3/4.

Гуфта мешавад, ки маркази барномаҳои байналмилалӣ бо зиёда аз 40 донишгоҳ дар 184 кишвари ҷаҳон ҳамкорӣ мекунад. Аз ҷумла дар донишгоҳҳои давлатҳои Русия, Чин, Қазоқистон, ИМА ва дигар кишварҳои Аврупо донишҷӯёни тоҷик таҳсил мекунанд.

Бояд гуфт, дар панҷ соли охир – солҳои 2019-2024 тибқи стипендияи президентии “Дурахшандагон” 71 донишҷӯи тоҷик дар хориҷи кишвар таҳсилро ба охир расониданд.

Бо тартиби қабул ва номгӯйи санадҳо барои таҳсил дар донишгоҳҳои кишварҳои хориҷа дар ин мавод мутолиа кунед.

Дар Telegram, Facebook ва Instagram бо мо бимонед.