Сокинони минтақаҳои наздисарҳадии шаҳри Исфараи Тоҷикистон ва Ботканди Қирғизистон якҷо барои тоза кардани қаламрави гузаргоҳҳои наздисарҳадӣ ҳашар баргузор карданд. Дар ин бора Зубайдулло Шомадов, сухангӯи ҳукумати Исфара ба "Азия-Плюс" хабар дод.
Ба иттилои манбаъ, дар ин чорабинӣ беш аз 400 нафар иштирок кардаанд.

Дар доираи ҳашар сокинони наздимарзии ду кишвар ба поккории роҳҳо ва ҷӯйборҳои минтақаи гузаргоҳи байни "Гулистон"-и Исфара ва "Қизил-Бел"-и Ботканд аз партов ва лой машғул шуданд.
Зубайдулло афзуд, ки техникаҳо аллакай кори ҳамворкунии роҳро оғоз кардаанд ва дар рӯзҳои наздик асфалтпӯшкунӣ шурӯъ мешавад.
Зикр шуд, ки пас аз анҷоми поксозӣ сокинони ҳарду ноҳия якҷоя хӯроки нисфирӯзӣ ва "оши дӯстӣ" тановул кардаанд.

Қобили зикр аст, ки моҳи декабри соли гузашта намояндагони расмии Тоҷикистон ва Қирғизистон хабар доданд, ки муайянкунии сарҳади давлатӣ байни кишварҳо ба анҷом расида, гурӯҳҳои корӣ раванди таҳияи ҳуҷҷатҳои ниҳоии таъйини марзро оғоз кардаанд.
Ин рӯйдодро сокинони минтақаҳои назди марзии ҳарду кишвар зиёда аз 20 сол интизор буданд. Гуфтушунидҳо оид ба муқаррар кардани хатти сарҳад байни Тоҷикистон ва Қирғизистон ҳанӯз соли 2003 оғоз гардида, лекин то соли 2022 бо танаффусҳои тӯлонӣ ва ғайримунтазам ҷараён доштанд. Аз 972 километр масофаи умумии сарҳад он замон ҳамагӣ каме бештар аз 50%-и он муайян шуда буд.

Бо сабаби мавҷудияти қитъаҳои зиёди баҳсӣ дар сарҳади байни ду кишвар низоъҳои зиёде вобаста ба истифодаи об, замин, роҳ ва чарогоҳҳо ба миён меомаданд, ки баъзан низомиён низ дар онҳо ширкат мекарданд. Соли 2021 ду задухӯрди калони мусаллаҳона рух дод, ки дар натиҷаи онҳо даҳҳо нафар ҷони худро аз даст доданд. Баъди ин ҳодисаҳо аз моҳи майи соли 2021 сарҳад бо қарори Қирғизистон баста шуд.
Ҳодисаи ахир ба раванди музокирот суръат бахшид. Аз тирамоҳи соли 2022 байни ду кишвар оид ба масъалаи таъйину аломатгузории сарҳад якчанд гуфтушунид доир гардид. Ҷаласаҳои гурӯҳҳои корӣ бонавбат дар Тоҷикистон ва Қирғизистон баргузор мешуданд, аммо ҷузъиёти ин мулоқотҳо эълон намешуданд.

Аввали моҳи августи соли 2024 вазири корҳои хориҷии Қирғизистон Жээнюек Кулубоев хабар дода буд, ки дар масъалаи сарҳади байни Қирғизистон ва Тоҷикистон "як қатор ҷузъиёт боқӣ мондаанд", ки дар муддати 2-3 моҳи оянда ҳаллу фасл мешаванд. Моҳи октябр раиси КДАМ Қирғизистон зикр карда буд, ки ҷараёни таъйину аломатгузории марз бо Тоҷикистон дар арафаи анҷомёбист. То ин дам ҳудуди 59-60 километри сарҳад номуайян боқӣ монда буд.
Дар Душанбе роҳи ҷудогонаи дучархаронӣ бунёд мешавад
Суғд. Афзоиши баррасии парвандаҳои вобаста ба терроризму экстримизм дар соли гузашта
Кумаки мутахассисони қазоқ ба Тоҷикистон дар рақамкунии ипотека
Хушкмеваи Тоҷикистонро ба намоишгоҳи байнулмилалии Gulfood Dubai-2025 бурданд
Соҳибкорони тоҷики муқими Русия дар Хатлон бо арзиши $1 миллион иншооти иҷтимоӣ бунёд кардаанд
Дар шаҳри Бохтар Боғи фарҳангӣ ва фароғатии нав сохта мешавад
Кушта шудани 1400 шаҳрванди Тоҷикистон дар ҷангҳои Сурияву Ироқу Афғонистон
Дар Душанбе “Боғи дӯстӣ”-и Тоҷикистону Ӯзбекистон бунёд мешавад
“Агар аз ту ёд ояд...” Таҷлили 75-солагии Муқаддас Набиева дар Душанбе
Бинои маъмурии боғи марказии ноҳияи Муъминободро оташ задаанд. Гумонбар дар кофтуков аст
Кулли ахбор
Авторизуйтесь, пожалуйста