Шон Спайсер, сухангӯи Кохи сафед гуфтааст,  "Доналд Трамп, президенти ИМА ба таври возеҳ фаҳмонд, ки ҳукумати Русия бояд Қрими ғасбшударо баргардонда, аз хушунат дар шарқи Украина, аз ҷумла дастгирии ҷудоихоҳон даст кашад".

Бино ба иттилои сомонаи Лоиҳаи хабарии Осиёи Марказӣ, Спайсер бар ин аст, ки президенти ИМА аз ҳама гуна амалҳои шиддатбахшандаи вазъ дар робита ба Москва худдорӣ мекунад. Ба гуфтаи вай, "Трамп интизор дорад, ки муносибатро бо Русия беҳтар хоҳад кард".

Спайсер аз ҷумла ёдовар шудааст, ки Никки Хейли, намояндаи доимии ИМА дар СММ 3 феврал, ҳангоми ҳузури нахустинаш дар Шӯрои амният амалҳои Русияро қотеъона маҳкум карда, Қримро ҷузъи Украина хонд. "Хейли қайд кард, ки таҳримҳои марбути нимҷазира то баргаштани он ба ҳайати Украина бекор нахоҳанд шуд", - афзуд Спайсер.

Стивен Мнучин, вазири нави молияи ИМА низ гуфт, таҳримҳое, ки дар робита ба нооромиҳои Украина зидди Русия ҷорӣ шудаанд, бекор намешаванд.

Русия соли 2014 Қримро аз Украина ғасб кард. Қонунӣ будани пайвастани нимҷазираро ба ҳайати Русия ҷомеаи ҷаҳонӣ эътироф накард.