Асри дирӯз, 23-юми май, раиси ҷумҳури Эрон Иброҳим Раисиро дар зодгоҳаш шаҳри Машҳад ба хок супориданд. Дар ҳамин ҳол Ситоди кулли нерӯҳои мусаллаҳи Эрон гузориши муқаддамотии Кумитаи олиро дар мавриди таҳқиқи сабаби садамаи чархболи ҳомили раиси ҷумҳур Иброҳим Раисиро мунташир кард.

Хабаргузории ИРНА гузориши ибтидоии Кумитаи олии Ситоди кулли нерӯҳои мусаллаҳи Эронро интишор кардааст, ки дар он аз ҷумла гуфта мешавад:

- Чархбол дар масири пешбинишуда роҳашро тай карда ва аз масири таъиншудаи парвоз набаромадааст.

- Тақрибан якуним дақиқа пеш аз садамаи чархбол, халабони чархболи суқуткарда бо ду чархболи дигари гурӯҳи парвоз тамос гирифтааст.

- Дар ҷузъҳои боқимондаи чархболи суқуткарда осори тир ё ҷойҳои шабеҳ ба он мушоҳида нашудааст.

- Чархболи суқуткарда пас аз бархӯрд оташ гирифтааст.

- Ба далели печидагии мавзеъ, меҳгирифтагӣ (туман) ва паст будани ҳарорати ҳаво амалиёти ҷустуҷӯ то шаб тамдид шуда ва тамоми шаб идома ёфт ва субҳи барвақти рӯзи душанбе (соати 5-и субҳ) бо кӯмаки ҳавопаймоҳои бесарнишини эронӣ нуқтаи аниқи фалокат маълум шуд ва ба ҷои ҳодиса қувваҳои хушкигарди амалиёти ҷустуҷӯ ҳозир шуданд.

- Дар муколамоти бурҷи посбонии ҳайати ҳавопаймо ягон ҳолати шубҳанок мушоҳида нашудааст.

Дар гузориши пешакии Кумитаи олӣ перомуни таҳқиқи сабабҳои садамаи чархболи ҳомили раиси ҷумҳур гуфта мешавад, ки ҷузъиёти дигари ин ҳодиса таҳқиқ мешавад ва барои ин кор вақти бештар лозим аст.

Бояд гуфт, бегоҳи дирӯз ҷасади Иброҳими Раисӣ, ҳаштумин раиси ҷумҳури Эрон дар Маҳшад ба хок супурда шуд. Инчунин дигар ҳамроҳонашро ҳам дар шаҳрҳои гуногуни Эрон дафн карданд.

Ёдовар мешавем, ки чархболи ҳомили раиси ҷумҳури Эрон Иброҳим Раисӣ рӯзи 19-уми май дар роҳи баргашт аз Табрез дар минтақаи Озарбойҷони шарқӣ суқут кард ва дар пайи ин ҳодиса маҷмаан 8 нафар ҷон бохтанд. Пас аз ин 5 рӯз дар Эрон мотами миллӣ эълон шуд.

Дар Telegram, Facebook ва Instagram бо мо бимонед.