Ба суратҳисоби хайрияи дар Сарраёсати хазинадории марказии Вазорати молия бозшуда то 6-уми май наздики 5 миллион сомонӣ маблағ ворид шудааст. Дар ин бора ба “Азия-Плюс” аз Вазорати молияи Тоҷикистон хабар доданд.

Ин маблағҳо ба ихтиёри Вазорати тандурустӣ ва ҳифзи иҷтимоии аҳолии ҶТ барои хароҷот баҳри роҳандозии тадбирҳои мубориза бо пандемияи коронавирус супорида мешаванд.

Қаблан дар бораи маблағҳои гузарондаи раисҷумҳури Тоҷикистон Эмомалӣ Раҳмон, дигар шахсони мансабдор, вазорату идораҳо ва ташкилоту корхонаҳо маълумот мунташир гардида буд.

Ғайр аз ин, қайд карданд дар Вазорати молия, Бонки ҷаҳонӣ барои вокуниш ба хатари пандемияи COVID-19 11,5 млн доллар ҷудо мекунад. Ин маблағ барои харидории маҷмӯи тестҳо, воситаҳои муҳофизат ва омӯзиши кормандони тиббӣ масраф мешавад.

Ҳамчунин дар Вазорат қарзи бефоизи 189,5 миллион долларро зикр карданд, ки рӯзи 6-уми май аз ҷониби Хазинаи байнулмилалии асъор тасдиқ шуд. Он ба маблағгузории тавозуни пардохт ва эҳтиёҷоти буҷет дар робита ба пандемияи коронавирус равона мешавад.

Тибқи маълумоти Вазорати молия, дигар созмону ташкилотҳо низ тасмим доранд, ки кумаки молиявӣ расонанд.

Масалан, Бонки осиёии рушд пешниҳоди маблағ дар ҳаҷми 50 миллион долларро дар нақша дорад, ки қисме аз он грант аст. Фонди авруосиёии субот ва рушд ба маблағи 50 миллион доллар қарзи имтиёзноки дарозмуҳлат (1%) ҷудо карданист.

Ёдрас мекунем, ки суратҳисобҳои хайрия аввали моҳи апрел “бо мақсади пурзӯр кардани чораҳои зиддиэпидемиологӣ дар робита ба ҳамагирии коронавируси COVID-19 ва мутамарказонидани кумакҳои башардӯстона” кушода шуданд. Суратҳисобҳо бо арзи миллӣ – сомонӣ, доллари амрикоӣ ва рубли русӣ боз шуданд.

Тибқи маълумоти расмӣ, то 6-уми май дар Тоҷикистон 379 ҳолати сироят аз коронавирус сабт шуда, 8 кас аз ин беморӣ фавтиданд. Ҳамчунин то 6-уми май 3596 нафар дар муассисаҳои тиббии кишвар зери назорати табибон қарор дошта, дар як шабонарӯзи охир 246 нафар пас аз гузаронидани ташхису муоина дар ҳолати қаноатбахш ба хонаҳояшон ҷавоб дода шудаанд.

Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед. 

Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.