Ягона постгоҳи назоратӣ дар марзи байни Тоҷикистону Чин - “Қулма” аз аввали моҳи октябри соли гузашта инҷониб баста боқӣ мемонад. Равуо бо ин роҳ бо ташаббуси ҷониби Чин манъ шуд.

“Ҳозир дар ин гузаргоҳ зиёда аз 260 адад мошинҳои бузургҳаҷми боркаш (фураҳо) бо молу колои тоҷирони тоҷик ҷамъ шудаанд”, - хабар дод рӯзи 18 феврал ба журналистон муовини сардори Хадамоти гумрук Азим Турсунзода.

Ба гуфтаи ӯ, аз оғози сол ҷониби Чин тариқи постгоҳи “Қулма” ба убури ҳамагӣ 25 автомашина бо молу маҳсулоти тоҷирони тоҷик иҷоза додааст.

Ӯ таъкид дошт, ки бар асари пандемияи коронавирус соли гузашта гузаргоҳи “Қулма” ҳамагӣ ним сол кор кардааст.

Ёдрас мекунем, ки аввали ҳамин ҳафта вазири корҳои хориҷии Тоҷикистон Сироҷиддин Муҳриддин зимни вохӯрӣ бо рӯзноманигорон дар ин робита изҳори умедворӣ намуд, ки ҷониби Чин гузаргоҳи “Қулма”-ро то охири моҳи феврал боз мекунад.

Қобили зикр аст, ки Чин ба сегонаи шарикони асосии савдои ҷумҳурӣ шомил буда, аз рӯйи ҳаҷми гардиши молу маҳсулот пас аз Русия ва Қазоқистон зинаи сеюмро ишғол мекунад.

Соли 2020 аз Чин ба Тоҷикистон ба маблағи ҳудуди 440 млн доллар молу коло ворид шудааст, ки 14% аз ҳаҷми умумии воридоти соли гузаштаи ҷумҳуриро ташкил медиҳад. Дар муқоиса бо як соли пешин, соли 2020 ҳаҷми гардиши молу маҳсулот байни Тоҷикистону Чин ба андозаи қариб 20% поин рафт.

Тоҷикистон аз Чин асосан маҳсулоти ғайриозуқа: масолеҳи сохтмон, қисмҳои эҳтиётии автомашинаҳо, сарулибос, техникаву таҷҳизоти гуногун ва дигар чизҳо ворид мекунад. Баъзе маҳсулоти ғизоӣ низ оварда мешавад.

Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед. 

Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.