Роҳбари Чеченистон Рамзан Қодиров ба сармураббии дастаи футболи «Терек»-и Грозний унвони «Корманди шоистаи тарбияи ҷисмонӣ ва варзиши Ҷумҳурии Чеченистон»-ро тақдим намуд.

Бино ба иттилои сомонаи расмии дастаи футболи «Терек», ба муносибати анҷоми мавсими футболи солҳои 2015-20160и Лигаи олии Русия Рамзан Қодиров ҳайати дастаро ба хӯроки шомгоҳӣ даъват карда, ба онҳо изҳори миннатдорӣ ва истироҳати хушу омодагии хуб ба мавсими ояндаро таманно кардааст.

Гуфта мешавад, сипас роҳбари Чеченистон ба ҳайати футболбозону мураббиёни даста мукофотҳои давлатӣ супурдааст.

Рашид Раҳимов футболбози шӯравӣ ва русиягӣ, ҳамчунин мураббӣ 18 марти соли 1965 дар шаҳри Душанбе ба дунё омадааст.

Нахуст ӯ дар дастаи «Захираҳои меҳнатӣ»-и Душанбе бозӣ кардаааст. Вай солҳои 1980 – 1991 ҳимоятгари дастаи «Помир»-и Душанбе буд. Сипас дар бошгоҳҳои футболи «Спартак»-и Маскав (1992, 1994), «Валядолид»-и Испания (1992 – 93), «Локомотив»-и Маскав (1993 – 1994), «Аустрия»-и Австрия (1995 – 1999), «Адмира-Ваккер»-и Австрия (2000 – 2001) ва СВ «Кели Рид»-и Австрия (2001) ҳунарнамоӣ кардааст.

Рашид Раҳимов инчунин қаҳрамони дукаратаи футболи Русия (1992, 1994), барандаи Ҷоми Русия (1992) мебошад. Ду бозии расмӣ дар ҳайъати мунтахаби Тоҷикистон ва чаҳор бозии дӯстона дар ҳайъати мунтахаби Русия низ дорад.

Пас аз анҷоми бозӣ Рашид Раҳимов мураббии футбол шуд. Давоми солҳои 2006-2007 дар «Амкар»-и Перм, солҳои 2007-2009 дар «Локомотив»-и Маскав ва солҳои 2009-2011 боз дар дастаи Амкар ба ҳайси сармураббӣ фаъолият дошт. Соли 2013 сармураббии дастаи «Терек»-и Грозний таъин шуд.