Субҳи имрӯз, 7-уми октябр, президенти Тоҷикистон Эмомалӣ Раҳмон ҷиҳати иштирок дар вохӯрии ғайрирасмии сарони давлатҳои иштирокчии Иттиҳоди Давлатҳои Мустақил ба шаҳри Санкт-Петербурги Федератсияи Россия сафар кард. Дар ин бора сомонаи расмии президенти Тоҷикистон иттилоъ медиҳад.

Гуфта мешавад, ки Эмомалӣ Раҳмонро дар ин сафар вазири корҳои хориҷӣ Сироҷиддин Муҳриддин, Ёрдамчии Президенти Ҷумҳурии Тоҷикистон оид ба масъалаҳои робитаҳои хориҷӣ ва дигар шахсони расмӣ ҳамроҳӣ мекунанд.

Дар вохӯрии мазкур, ки ду рӯз пас аз таҷлили зодрӯзи президенти Тоҷикистон Эмомалӣ Раҳмон ва дар рӯзи зодрӯзи президенти Русия Владимир Путин баргузор мегардад, иштироки сарони дигар кишварҳои аъзои ИДМ дар назар аст.

Дар ҳамин ҳол, расонаҳои Қирғизистон менависанд, ки президенти ин кишвар Содир Ҷабборов аз сафар ба Санкт – Петербург даст кашидааст. Инро котиби матбуотии президенти Қирғизистон низ тасдиқ намуда гуфтааст, ки сабаби даст кашидан аз мулоқоти мазкур серкории президенти Қирғизистон мебошад.

Ба навиштаи расонаҳои ин кишвар, дар назар аст, ки пас аз анҷоми мулоқоти расмӣ, маросими таҷлили зодрӯзи президентҳои ду давлат - Эмомалӣ Раҳмон ва Владимир Путин баргузор гардад. Ҳамчунин, тақдими ордени “Барои хизмат дар назди Ватан” дараҷаи 3 ба Эмомалӣ Раҳмон, ки чанд рӯз пеш аз ҷони президенти Русия Владимир Путин эҳдо гардид, низ дар назар дошта шудааст.

Дар TelegramFacebookInstagramViberЯндекс.ДзенOK ва Google Новости бо мо бимонед.