Имрӯз, 17-уми октябр, Эмомалӣ Раҳмон, раисҷумҳури Тоҷикистон зимни сафари кории худ ба шаҳри Турсунзода як қатор иншооти навбунёдро ба истифода дод. Ӯро дар ин сафар Рустами Эмомалӣ, шаҳрдори Душанбе ҳамроҳӣ намуд.
Нахуст бо иштироки президент дар назди Литсей-интернати шаҳри Турсунзода бинои иловагии таълимӣ, хобгоҳ, китобхона, майдончаи варзишӣ, меҳмонхона, маҷлисгоҳ, ошхона ва бунгоҳи тиббӣ ифтитоҳ гардид. Бинои иловагии таълимӣ дорои 8 синфхонаи муҷаҳҳаз барои 240 хонанда ва бинои хобгоҳ дорои 48 ҳуҷраи барҳаво бо 400 рахти хоб буда, барои бо ҷойи хоб таъмин намудани хонандагони дурдаст, аз ҷумла шаҳри Ҳисор ва ноҳияи Шаҳринав пешбинӣ шудааст.
Президенти кишвар дар ҳамон мавзеъ 4 мактаби таҳсилоти миёнаи умумӣ ва 2 муассисаи томактабии хусусиро дар шаҳри Турсунзода ба таври маҷозӣ мавриди баҳрабардорӣ қарор дод. Дар деҳоти Қаратоғи деҳаи Зарнисори шаҳри Турсунзода бинои дуошёнаи иловагии Муассисаи таҳсилоти миёнаи умумии №103 ва дар деҳаи Неъматбачаи деҳоти Регари шаҳри Турсунзода бинои иловагии дуошёнаи Муассисаи таҳсилоти миёнаи умумии рақами 54 ифтитоҳ гардид.
Эмомалӣ Раҳмон дар деҳаи Меҳргони деҳоти “10-солагии Истиқлолият” бинои иловагии Муассисаи таҳсилоти миёнаи умумии №80, ки барои 450 хонанда дар ду баст пешбинӣ шудааст, мавриди истифода қарор дод.
Дар деҳаи “Шодиёна”-и деҳоти Регари шаҳри Турсунзода бинои иловагии навбунёди Муассисаи таҳсилоти миёнаи умумии №68 мавриди истифода қарор дода шуд. Иншооти мазкур аз ҷониби соҳибкори ватанӣ Ҷӯрабек Муҳибов бунёд гардидааст.
Дар кӯчаи Охун Бобоеви шаҳри Турсунзода, бинои нави Муассисаи таҳсилоти томактабии “Лола” ва дар деҳаи Иттифоқи деҳоти Регари шаҳри Турсунзода бинои нави Муассисаи таҳсилоти томактабии “Гулсум” ба истифода дода шуд.
Дар идомаи сафари корӣ дар шаҳри Турсунзода Эмомалӣ Раҳмон бинои нави Муассисаи томактабии хусусии “Бибиоиша”-ро дар деҳаи Заркамар 1-и деҳоти ба номи Ҷӯра Раҳмон мавриди истифода қарор дод. Иншооти навбунёди таълимӣ, ки аз 2 ошёна иборат аст, барои ба таълиму тарбия фаро гирифтани 300-350 кӯдак пешбинӣ шудааст.
Эмомалӣ Раҳмон дар идомаи сафари корӣ дар шаҳри Турсунзода аз хоҷагии деҳқонии ангурпарварии “Ҳоҷӣ Неъмат” дидан намуда, бо намоиши маҳсулоти истеҳсолкардаи хоҷагӣ, аз қабили навъҳои гуногуни ангур, мавизи хушсифат, ширинии аз ангур омодашуда, сабзавот ва дигар зироати кишоварзӣ шинос шуд.
Ҳамчунин дар шаҳри Турсунзода бинои нави шуъбаи Кумитаи давлатии амнияти миллӣ дар шаҳри Турсунзода, бинои таълимии Литсей –Интернат барои кӯдакони болаёқати шаҳри Турсунзода барои 1000 хонанда дар ду баст, сардхонаи хоҷагии деҳқонии “Ғайрат-2020”, се муассисаи томактабӣ барои 700 кӯдак, 5 муассисаи таҳсилоти миёнаи умумӣ барои 3500 хонанда дар 2 баст ва корхонаи хиштбарорӣ ва қубурҳои пластикии ҶДММ “Нигора” бо иқтидори 4,6 млн дона хишт ва 3 тонна қубурҳои пластикӣ дар як сол ба истифода дода шуд.
Дар ҳошияи сафари кории Эмомалӣ Раҳмон ба шаҳри Турсунзода инчунин маркази савдо бо 300 нуқтаи савдо дар маҳаллаи 5-уми шаҳр, марҳилаи дуюми бозори “Ҷаҳони Бозургон" бо 1000 нуқтаи савдо, бинои баландошёнаи истиқоматӣ бо 192 хона дар кӯчаи Мирзо Турсунзода, дармонгоҳҳои хусусӣ дар кӯчаҳои “15-солагии Истиқлолият” ва “Аҳамади Дониш” мавриди истифода қарор гирифтанд, ки дар онҳо дар маҷмӯъ зиёда аз 1500 нафар бо ҷойи кори доимӣ таъмин шуд.
Руcский