Намояндагии QNet дар Тоҷикистон барҳам хӯрда, ширкат тибқи қарордод тариқи агентии маҳаллии ҶДММ «ТАКТ-Сервис»  ба фаъолияти худ идома мебахшад.

Қобили зикр аст, ки ҳанӯз 18 март дар ВАО-и расмӣ дар бораи барҳам хӯрдани ширкати QNet эълонҳо ба нашр расида буданд.

Аз ширкати QNet ба «Азия-Плюс» дар ин робита иттилоъ доданд, ки ин тарзи фаъолият як таҷрибаи байнулмилалист, ки як қисмати фаъолияти муайян ба шарикон дода мешавад, то ки пешниҳоди хизматгузориҳо пурсамар гардида, захираҳо сарфа шаванд.

QNet ширкатест, ки ба фурӯши мустақим тавассути маркетинги шабакавӣ ба воситаи Интернет машғул аст. Дар бисёре аз кишварҳои ҷаҳон, аз қабили Гонконг, Сингапур, Тайиланд, Филипин, Ҳиндустон, Туркия, Арманистон, Индонезия, Малайзия, Русия ва ғайра расман ба қайд гирифта шудааст.

Ширкат соли 1998 дар Гонконг таъсис ёфта, дар самтҳои фурӯши мол ва маҳсулоти эксклюзивӣ, пешниҳоди хизматгузориҳо, омӯзиш ва таълимот, рушди тиҷорат, идоракунии лоиҳаҳо, логистика, маркетинги шабакавӣ, савдои чакана фаъолият мекунад.

Ширкат ба бахшҳое чун телекоммуникатсия, барномаҳои ТВ ва радио, кори бонкӣ, тиҷорат дар бахшҳои гуногун, аз ҷумла бахшҳои истироҳату фароғат ва меҳмонхонаҳо сармоягузорӣ мекунад.

Фаъолияти асосии ширкат тариқи шабакаи Интернет амалӣ мешавад. Мизоҷон тавассути Интернет аз тамоми гӯшаву канори ҷаҳон бо кумаки намояндагони QNet молу маҳсулоти эксклюзивӣ дастрас карда метавонанд. Аммо сокинони Тоҷикистон ин ширкатро дар фиреби аҳолӣ ва бунёди пирамидаи шабакавӣ муттаҳам медонанд.