Даромадҳои буҷети Тоҷикистон аз ҳисоби ҷаримаҳо назар ба интизорие, ки ҳукумати кишвар дошт, зиёдтар гардидаст. Ин аз ҳисоботи Вазорати молияи Тоҷикистон оид ба иҷрои буҷети давлатӣ барои 9 моҳи соли 2024 бармеояд.
Тибқи нақшаи Вазорати молия, дар 9 моҳи соли ҷорӣ ба буҷет аз ҳисоби ҷаримаҳо бояд 176,3 миллион сомонӣ ворид мешуд. Вале даромади буҷет аз ин сарчашма 327,3 миллион сомонӣ ё 185,6% нақшаро ташкил дод. Ин рақам ба андозаи 83 миллион сомонӣ (34%) нисбат ба ҳамин давраи соли гузашта зиёдтар аст.
Соли 2023 дар моҳҳои январ-сентябр ба қисми даромади буҷет аз ҳисоби ҷаримаҳо 244,3 млн сомонӣ ва соли 2022 – 230,3 млн сомонӣ ворид гардида буд. Мутаносибан нақшаҳо аз рӯи ин нишондиҳандаҳо ба андозаи 151,5% ва 216,6% иҷро шуданд.
Яъне тибқи омори расмӣ, ҳар рӯз ба буҷети давлат аз ҳисоби ҷаримаҳо тақрибан 1,2 миллион сомонӣ ворид мегардад. Маблағи ҷаримаҳо 2%-и буҷаи кишварро дар 9 моҳи соли 2024 ташкил медиҳад.
Афзоиши даромадҳо аз ҳисоби ҷаримаҳо дар ҳолест, ки шикоятҳои мардум аз зиёд шудани маблағи ҷаримаҳо бештар шудааст. Аз ҷумлаи бузургтарин ҷаримаҳо – ҷаримаҳо барои вайрон кардани қоидаҳои гузаронидани маросимҳои тӯй, гусел ва пешвози зоирин, қоидаҳои ҳаракат дар роҳ ва дигарон мебошанд.
Аз ҷумла, дар 9 моҳи соли ҷорӣ сокинон барои вайрон кардани меъёрҳои Қонуни Ҷумҳурии Тоҷикистон “Дар бораи танзими ҷашну маросим дар Ҷумҳурии Тоҷикистон” 7,8 млн сомонӣ ҷарима шудаанд.
Руcский