Пас аз амали террористӣ дар “Крокус Сити Ҳолл” тавассути фурудгоҳи байналмилалии Кӯлоб ҳар ҳафта то 300 нафар аз Русия ба кишвар бармегарданд, ки аксари онҳо муҳоҷирони ихроҷшудаи тоҷик мебошанд. Ин ҳолат то имрӯз идома дорад.

Нуралӣ Ҳомидзода, директори Фурудгоҳи байналмилалии Кӯлоб дар як нишасти матбуотӣ гуфт, баъди ин ҳодиса ва маҳдудиятҳои нав ба муҳоҷирон дар Русия сафари онҳо ба ин кишвар кам шуда, даромади фурудгоҳ 50% коҳиш ёфтааст.

Вай иттилоъ дод, ки баъди ҳодисаи “Крокус” шумораи парвозҳо аз 900 ба 422 адад поин шуд.

Бояд гуфт, пас аз ҳодисаи "Крокус" дар Маскав фишору таъқиб ва боздошту ихроҷи муҳоҷирон дар Русия афзуд. Маҳз баъди ин ҳодиса мақомоти Русия ба маҳдуд кардани ҳуқуқи муҳоҷирон дар ин кишвар оғоз карданд. 

Аз ҷумла давоми гузашта дар беш аз 10 минтақаи Русия корҳои гуногун барои муҳоҷиронро манъ карда, қонунҳои дигари ин кишварро пурзӯр карданд.

Соли 2024 дар фурудгоҳҳои Русия садҳо муҳоҷири тоҷикро танҳо ба хотири риш доштан ё ба ҳаҷ рафтан ё ҳатто ба хотири “писанд нашудани чеҳра” аз ин кишвар хориҷ карда, гуфтанд, ки “шумо барои мо дарди сар ҳастед”.

Тибқи маълумоти расмӣ, дар нимсолаи аввали соли 2024 танҳо аз фурудгоҳҳои Русия 3 ҳазору 400 муҳоҷири тоҷик ба Ватан ихроҷ шудаанд. То ҳол маълум нест, ки дар як соли пурраи 2024 чанд шаҳрванди Тоҷикистон аз Русия ихроҷ шудаанд.

Дар Telegram, Facebook ва Instagram бо мо бимонед.