Душанбе. 20-уми май. ОИ «Азия-Плюс» - Офатҳои табиӣ то ҳанӯз Тоҷикистонро ором намегузоранд.

            Чӣ тавре ки ба ОИ «Азия-Плюс» аз Кумитаи ҳолатҳои фавқулодда ва мудофиаи граждании ҶТ иттилоъ доданд, чанде қабл, тахминан соатҳои 23 бар асари боришоти шадид ба хонаи истироҳати корхонаи Роҳи оҳани Тоҷикистон дар дараи Ромит сел омад. «Ду нафар зан, ки дар ошхонаи хонаи истироҳат машғули кор буданд, қурбони сел гардиданд ва то ҳанӯз ҷасадҳои онҳо пайдо нашудааст», - гуфт манбаъ.

            Ба иттилои манбаъ, худи ҳамон рӯз, 19-уми май боронҳои шадид боиси қисман хароб гардидани беш аз даҳҳо манзили истиқоматӣ дар ноҳияи Нуробод гардиданд. «Хушбахтона, талафоти ҷонӣ ба қайд гирифта нашуд», - афзуданд дар КҲФ ва МГ ҶТ.