Сардори нозироти андози шаҳри Бӯстони вилояти Суғд Бедил Ҳусейнов аз вазифааш озод карда шудааст: номи ӯ пас аз талаби $500 “доля” (ҳақ) ҳар моҳ аз соҳибкор расонаӣ шуд.

Худи Бедил Ҳусейнов низ аз мансаб барканор шуданашро ба “Азия-Плюс” тасдиқ кард. Ӯ қайд кард, ки 7-уми феврал аз вазифаи сардори нозироти шаҳри Бӯстон (собиқ Чкаловск) озод карда шудааст.

“Инкор ё гуфта наметавонам, ки барканории ман аз мансаб ба баҳсам бо соҳибкор Фарҳод Юлдошев ё ба сабаби дигар вобаста аст. Қарори роҳбариятро оромона қабул кардам. Дар ин низом ман солҳои зиёд кор кардам. Худо хоҳад, агар дар оянда имкон шавад, боз дар ҳамин низом баҳри шукуфоии кишвар кор хоҳам кард”, - иброз дошт ба “Азия-Плюс” Ҳусейнов.

Соҳибкор қаноатманд аст

Соҳибкор Фарҳод Юлдошев зимни суҳбат бо хабарнигори “Азия-Плюс” изҳор дошт, ки аз кор озод шудани Ҳусейнов аломати хуб аст.

“Пас аз он воқеа дигар моро ташвиш надоданд. Бисёр хурсандам, ки ӯро аз мансаб барканор кардаанд, адолат пирӯз шуд. Шахсоне мисли ӯ ба рушди кишвари мо халал мерасонанд. Агар ҳамаи афроди ба ӯ монандро аз кор озод кунанд, Тоҷикистон минбаъд ҳам рушд меёбад. Ӯ ба ҳар касе, ки бо ӯ гапзанон намекард, зарар расонида метавонист”, - гуфт Юлдошев.

Ӯ ҳамчунин аз ҳамаи соҳибкорони Тоҷикистон даъват кард, ки вобаста ба масъалаҳои фишор аз ҷониби мақомоти андоз ва дигар шахсон  ошкоро изҳори назар кунанд.

Ёдрас мекунем, ки нимаи моҳи декабри соли гузашта дар Facebook акси эълоне нашр шуд, ки соҳибкор аз шаҳри Бӯстони вилояти Суғд дар даромадгоҳи маркази хизматрасонии худ овехта буд. «Фурӯхта мешавад. Корманди андоз Ҳусейнов Бедил 500 доллар моҳона "доля" талаб дорад»”, - навишта шуда буд дар эълон.

Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед. 

Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.