Эмомалӣ Раҳмон, раиси ҷумҳури Тоҷикистон тағйирот ба Кодекси ҷиноятии Тоҷикистонро имзо кард, ки тибқи он минбаъд барои гузоштани “лайк” шаҳрвандон зиндонӣ намешаванд. Ин тағйирот имрӯз, 14-уми май дар баробари чанд қонуни дигар ба имзо расид, хабар медиҳад хадамоти матбуотии президент.

Моҳи октябри соли 2024 Эмомалӣ Раҳмон аз беасос боз кардани парвандаи ҷиноятӣ барои “лайк” дар интернет ва ҳамчун “далел ҳисобидани маводу наворҳои дар шабакаҳои иҷтимоӣ паҳнгардида” интиқод карда, он замон гуфта буд, “ба ин амал бояд хотима дода шавад”.

Пас аз интиқоди раиси ҷумҳур, вакилони Маҷлиси намояндагон рӯзи 10-уми апрел ба Кодекси ҷиноятӣ илова ворид карданд ва рӯзи 13-уми май Маҷлиси миллӣ ҳам онро пазируфт.

Имрӯз ба ин илова раиси ҷумҳури Тоҷикистон ҳам имзо гузошт ва пас аз нашраш дар матбуот он ҳукми қонунӣ пайдо мекунад.

То имрӯз дар асоси ду модда - 179, иловаи 3 ва 307, иловаи 1-и Кодекси ҷиноятӣ шаҳрвандон ба ҷавобгарии ҷиноятӣ кашида мешуданд. Ин ду банди қонун миёни мардум бештар бо мафҳуми ҷазо барои “писандидан” (“лайк”) ва бознашр (“поделится”)-и матолиби мамнӯъи дар интернет нашр ва паҳншуда маъмул аст.

Ба иттилои Сарраёсати иҷрои ҷазои ҷиноятӣ, ҳоло 1 ҳазору 507 шаҳрванд бинобар гузоштани “лайк” дар навору гузоришҳои интернетӣ ва навиштани “шарҳу мулоҳизаҳои дорои мазмуну муҳтавои террористӣ экстремистӣ” дар зиндонҳо қарор доранд. Баъди иҷрои ин тағйирот ҷазои онҳо сабук мешавад ё не, маълум нест.

Ба навиштаи хадамоти матбуоти раиси ҷумҳур, Эмомалӣ Раҳмон ҳамчунин ба чанд қонуни дигар, ки Маҷлиси намояндагон ва Маҷлиси миллии Тоҷикистон қабул ва ҷонибдорӣ карда буданд, имзо гузоштааст.

Инҳо қонун “Дар бораи сармоя ва ҳавасмандгардонии фаъолияти сармоягузорӣ”, қонун “Дар бораи уҳдадории ҳарбӣ ва хизмати ҳарбӣ” мебошанд.

“Қонунҳои баимзорасида барои рушди иқтисодиву иҷтимоии кишвар ва баланд бардоштани зиндагии мардум мусоидат менамоянд”, - менависад манбаъ.

Дар Telegram, Facebook ва Instagram бо мо бимонед.