Вазорати нақлиёти Тоҷикистон барои дар ҳолати муносиб барои ҳаракати нақлиёт нигоҳ доштани роҳҳои мошингард аз Душанбе ба самти ВМКБ ва водии Рашт техникаи махсус ва таҷҳизот мехарад.

Зимни нишасти хабарии имрӯза вазири нақлиёти ҷумҳурӣ Худоёр Худоёрзода изҳор намуд, ки аз ҳисоби қарзи Бонки аврупоии таҷдиду рушд 88 адад техникаи махсус ва таҷҳизот дастрас гардида, мувофиқи масофаи роҳ ва техникаву таҷҳизоте, ки айни замон дар ихтиёри минтақаҳо қарор дорад, тақсим карда мешавад.

“Аз ин шумор айни замон 23 адад техникаи махсус, аз ҷумла 4 булдозер, 6 мошини боркунанда ва 5 грейдер  дар роҳ ба сӯйи Тоҷикистон қарор доранд, ки барои дар ҳолати муносиб ба истифода нигаҳдории роҳҳо ба Бадахшону водиии Рашт фиристода мешаванд”, - иброз дошт вазир.

Бино ба гуфтаи ӯ, дар муқоиса бо дигар минтақаҳо, танҳо дар Хоруғу Ишкошим камбуди техникаи истифода дар роҳҳо ба мушоҳида расида, ягона мошини боркунандае, ки дар Ишкошим кор мекард, тарма ба дарё бурдааст.

“Ба сурати умум дар Хоруғ 109 адад техника барои истифода дар роҳҳо мавҷуд буда, лекин танҳо 66%-и онҳо коршояманд”, - қайд кард ӯ.

Вазир ҳамчунин сабаби баста шудани роҳи Хоруғ – Ишкошимро дар нимаи моҳи январ шарҳ дода, изҳор намуд, ки хабарҳои гӯё аз ҷониби сокинони маҳаллӣ дастӣ тоза шудани он асоси воқеӣ надоранд.

“Ман ҳамчун вазири нақлиёти Тоҷикистон итминон медиҳам, ки ин хабарҳо дурӯғи маҳзанд. Мо ба он ҷо ҳамаи техникаи нави махсусро аз Кӯлобу Восеъ сафарбар намудем, то ки роҳ ба Хоруғ боз шавад”, - зикр кард Худоёрзода.

Ба қавли Худоёрзода, тозакунии роҳи Хоруғ – Ишкошим хеле душвор сурат гирифта, бинобар сабаби хатари тармафароӣ се рӯз кормандон ба роҳ набаромаданд. “Бо ҳамин сабаб замони Иттиҳоди Шӯравӣ ин роҳро муддати ҳатто як моҳ аз тарма тоза мекарданд”, - таъкид дошт вай.

Ӯ ҳамчунин қайд кард, ки дар ҷараёни иҷрои корҳои тозакунии роҳ чандин нафар кормандон зери тарма монда, ҳарчанд наҷоти бархе аз онҳо муяссар гардида бошад ҳам, ду нафарашон ҳалок шуданд.

Қобили зикр аст, ки дар қаламрави шаҳру навоҳии Тоҷикистон 64 муассисаҳои истифодабарии роҳҳо амал мекунанд, ки 2 ҳазору 930 нафар дар онҳо машғули коранд.

“Аз ин шумор 1233 нафар кормандони хатҳои роҳ мебошанд”, - хабар дод ба “Азия-Плюс” сардори шуъбаи истифобарӣ, тарҳрезӣ ва баҳодиҳии роҳҳои Вазорати нақлиёти ҷумҳурӣ Ҳукуматшо Оқсақолов.

Бино ба маълумоти роҳбар, дар ихтиёри роҳсозони кишвар  951 адад техника қарор дорад, ки танҳо 609-тои он коршоям мебошанд.

Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.