Дар қаламрави ВМКБ рӯзи 2 август тамринҳои низомии бузургмиқёси сохторҳои қудратии Тоҷикистон оғоз гардиданд. Ин машқҳо бо дастури президенти мамлакат Эмомалӣ Раҳмон гузаронида мешаванд.

Тавре ба “Азия-Плюс” сардори маркази матбуоти Вазорати мудофиаи ҷумҳурӣ полковник Фаридун Маҳмадализода хабар дод, дар тамринҳо то 10 ҳазор нафар хизматчиёни ҳарбии Қувваҳои мусаллаҳи Тоҷикистон, намояндагони сохторҳои қудратӣ, инчунин сарбозону афсарони эҳтиётӣ иштирок мекунанд.

Ба ин тамринҳо наздики сад адад техникаи зиреҳпӯш, авиатсия ва автомобилҳои ҳарбӣ сафарбар шудаанд.

Ба ҷузъу том ва воҳидҳои ҳарбие, ки дар машқҳо иштирок мекунанд, шахсан вазири мудофиаи Тоҷикистон Шералӣ Мирзо фармондеҳӣ мекунад. Тамринҳо рӯзи 5 август ба итмом мерасанд.

Мувофиқи фарзияи машқҳо, гурӯҳҳои сершумори террористӣ кӯшиш мекунанд, ки аз Афғонистон ба қаламрави Тоҷикистон ворид шаванд. Ин амал қисман ба онҳо муяссар мешавад. Вазифаи ҳайати шахсии дар тамринҳо иштирокдошта зада баргардонидан ва маҳви террористон мебошад.

Таъкид шуд, ки дар размоиш тарзи амалу рафтор ҳангоми ба иҳота гирифтани нерӯҳои терроризми байнулмилалӣ, ки ба қаламрави ҷумҳурӣ даромадаанд, инчунин ташкили мудофиаи қаламрав, сафарбарии афсарону сарбозону эҳтиётӣ мавриди омӯзиш қарор гирифта, дар таҷрибаи амалӣ санҷида мешаванд.

Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед. 

Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.