Зимни боздиди раиси вилояти Суғд Раҷаббой Аҳмадзода аз  корхона иттилоъ доданд, ки "Оби Зулол" бо воридсозии хатҳои нави технологӣ тасмим дорад, ки истеҳсоли маҳсулоти ғизои бачагона ва афшураҳоро ба роҳ монанд.

Тавре хадамоти матбуоти раиси вилояти Суғд хабар медиҳад, корхона дар раванди саноатикунонии кишвар дар мамлакат аввалин шуда истеҳсоли маҳсулоти хӯроквории ғизои кӯдаконро дар зарфҳои “Дой-пак” ба роҳ хоҳад монд.

“Бо ин мақсад корхона аз ширкати “Navatta Group”-и Итолиё хатти технологии “GUALAPACK» -ро ба маблағи наздик 700 ҳазор евро харидорӣ намуда, айни замон насби хатти технологӣ идома дорад ва тавассути таҷҳизоти нав дар зарфҳои “Дой-пак” аз меваҳои себ, шафтолу, нок, қулфинай маҳсулот истеҳсол карда мешавад”, - омадааст дар хабари дафтари матбуот.

Тибқи нақша дар назар аст, ки барои кӯдакон, наврасони синни томактабӣ ва ҷавонон омехтаи меваҳои пухтасоидашуда ё худ смузи аз гулчини меваҳо, олу, себ, шафтолу, биҳӣ, нок ва барои гуруҳи васеи истеъмолкунандагон нок, олу, анор, олуча бо мағзи ин меваҳо истеҳсол карда шавад. Ашёи хоми асосӣ барои маҳсулоти истеҳсолшаванда хамираи меваҳои ватанӣ маҳсуб ёфта, корхона бо хоҷагиҳо барои харидории 20 ҳазор тонна мева шартнома бастааст.

Гуфта мешавад, ҳангоми пурра ба кор андохтани хатҳои нави истеҳсолӣ, ки дар маҷмӯъ ба маблағи 2,5 миллион евро харидорӣ шудааст, имкон пайдо мешавад, ки ба маблағи 120 миллион сомонӣ маҳсулоти иловагӣ истеҳсол ва беш аз 50 ҷойи корӣ таъсис дода шавад.

Зикр мегардад, ки маҳсулоти истеҳсолшаванда тибқи нақша ба бозорҳои дохилӣ бароварда шуда, ҳамзамон ба Федератсияи Россия ва Қазоқистон содирот карда мешавад.

Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед. 

Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.