Ба муносибати 79-умин солгарди ҷашни Рӯзи Ғалаба ба собиқадорони Ҷанги Бузурги Ватанӣ (ҶБВ) дар кишварҳои минтақаи Осиёи Марказӣ аз 10 то зиёда аз 6 ҳазору 800 доллар кӯмакпулӣ тақдим гардид.
Қобили зикр аст, ки маблағ ба собиқадорон дар сатҳи ҷумҳуриявӣ, минтақавӣ ва маҳаллӣ, ки ҳаҷми онро худашон муқаррар мекунанд, пардохт карда мешавад.
Туркманистон - $57
Президенти Туркманистон дастур дод, ки барои собиқадорон дар ҳаҷми 200 манат кумакпулӣ дода шавад. Тибқи қурби бонкӣ ин ба 57 доллар ва дар бозори сиёҳ - ба 10 доллар баробар аст.
Дар бораи ба чӣ қадар одамон додани ин маблағ маълумоти дақиқ нест. Ин камтарин маблағ барои собиқадорон миёни кишварҳои минтақаи Осиёи Марказӣ аст.
Қазоқистон - $3412
Маблағи бештар ба собиқадорони ҷанг дар Қазоқистон ҷудо карда шуд. Дар ҳамаи минтақаҳои ин кишвар ба собиқадорони ҶБВ кумакпулии моддии якдафъаина дар ҳаҷми на камтар аз 1,5 млн танга (3 ҳазору 412 доллар) ҷудо карда мешавад.
Маблағи умумии кумакпулӣ, ки мақомоти маҳаллии ҳокимияти иҷроия барои пардохт ба зиёда аз 50 ҳазор собиқадорон, аз ҷумла коргарони ақибгоҳ, сокинони Ленингради муҳосирашуда, занҳои бевамондаи ҷанговарон 3 млрд танга ( беш аз 6,8 млн доллар)-ро ташкил додааст.
Шахсони дар ҷабҳаҳо ҷангидаи Қазоқистон имрӯз 148 нафарро ташкил дода, ба онҳо аз мақомоти минтақа ҳам кумакпулӣ дода шуд. Аз ҷумла, 6 собиқадор аз вилояти Ақмола ба муносибати ҷашн ҳар кадоме 3 млн танга (6 ҳазору 825 доллар) гирифтаанд.
Қирғизистон - $1130
Ба ифтихори ҷашни Рӯзи Ғалаба ҳар як иштирокчии ҷанг дар Қирғизистон аз фонди президенти кишвар 100 ҳазор сом (тақрибан 1 ҳазору 130 доллар) гирифтааст.
Бино ба маълумоти ахир, айни замон дар Қирғизистон ҳамагӣ 41 нафар собиқадорон боқӣ мондаанд.
Ӯзбекистон - $1578
Бо супориши президенти Ӯзбекистон ба ҳар як иштирокчӣ ва маъюби ҶБВ дар ин кишвар ба маблағи 20 млн сӯм (зиёда аз 1 ҳазору 578 доллар) мукорфотпулии якдафъаина ҷудо карда шуд.
Тоҷикистон - $3600
Дар Тоҷикистон ҳар кадоме аз 24 собиқадори боқимонда 40 ҳазор сомонӣ гирифтанд. Ин ба зиёда аз 3 ҳазору 600 доллар баробар аст. Маблағ аз фонди захиравии президент ҷудо карда шуд. Ин маблағ нисбат ба соли гузашта зиёдтар аст - соли 2023 ба ҳар як собиқадор 18 ҳазор сомонӣ (1 ҳазору 650 доллар) дода шуда буд.
Ғайр аз ин, дар Душанбе ба ҳар як собиқадор (онҳо дар пойтахт 3 нафар боқӣ мондаанд) 10 ҳазор сомонӣ, вилояти Суғд (6 иштирокчии ҷанг) - ҳудуди 7 ҳазор сомонӣ ва коргари ақибгоҳ - 4 ҳазор сомонӣ ҷудо карда шуд.
Раиси вилояти Хатлон ба ҳар кадоме аз 10 собиқадори боқимонда дар минтақа 5 ҳазор сомонӣ ҷудо кард. Ба онҳо ҳамчунин аз ҳисоби мақомоти маҳаллии шаҳру ноҳияҳои маҳалли зисташон низ кумакпулӣ дода шуд.
Руcский