Соли 2024-ум 6 шаҳрванди Тоҷикистон, ки дар хориҷа ба таҳсили ғайриқонунии динӣ машғул буданд, ба ватан баргардонида шуданд. Ҳоло 39 каси дигар таҳсили динии ғайриқонуниро идома медиҳанд. Дар ин бора Сулаймон Давлатзода, раиси Кумитаи дин, танзими анъана ва ҷашну маросим зимни нишасти хабарӣ иттилоъ дод.

 

“Ба Ватан бармегардонем”

Ӯ рӯзи 31-уми январ дар ҳузури рӯзноманигорон гуфт, аксари ин шаҳрвандон дар Туркия ва қисме дар Арабистони Саудӣ ба таҳсил машғуланд.

“Мо бо мақомоти масъул ин масъаларо пайгирӣ дорем, бо волидайни он шаҳрвандон ҳамеша гуфтугӯ ва кӯшиш мекунем, ки онҳоро ба Ватан баргардонем”, - гуфт раиси кумита

Сулаймон Давлатзода изҳори нигаронӣ кард, ки ҳоло ҳам аз ҷониби гурӯҳҳои ифротгаро шаҳрвандони Тоҷикистон ба таҳсили ғайрирасмии динӣ ҷалб мешаванд ва ба ин васила ба сафи гурӯҳҳои террористиву эксромизмӣ мепайванданд.

Сулаймон Давлатзода
Акс аз Asia-Plus

 

Ду роҳи таҳсили динии расмӣ

Ба гуфтаи вай, ҳоло ду роҳи таҳсили расмии динӣ аз ҷониби мақомоти масъули Тоҷикистон пешбинӣ шудааст. Яке пешниҳоди квота барои таҳсили динӣ дар хориҷа ва дигар, дар дохили кишвар ҷорӣ кардани омӯзишҳои онлайнии динӣ барои ҷавонон ва занону бонувон.

“Ҳоло бурсияи донишгоҳҳои исломии Арабистони Саудӣ, Туркия, Қатар ва чанд кишвари дигар ба Маркази “Дурахшандагон” пешниҳод мешавад ва ин марказ имтиҳон мегирад, довталабонро интихоб мекунад ва ба таҳсили расмӣ мефиристад”, - гуфт Давлатзода.

Ӯ барои мисол гуфт, ки соли таҳсили гузашта қариб 40 шаҳрванди кишвар барои таҳсили расмии динӣ аз тариқи Маркази “Дурахшандагон” ба Арабистони Саудӣ равон карда шудаанд.

Аммо ӯ дақиқ нагуфт, ки аз дигар кишварҳо чанд квота пешниҳод гардидааст.

 

Таҳсили исломӣ дар Тоҷикистон чӣ гуна аст?

Бояд гуфт, ки дар Тоҷикистон ҳоло танҳо дар Донишкадаи исломии Тоҷикистон метавон таҳсили олии динӣ гирифт. Ҳоло беш аз 750 донишҷӯ дар ин донишкада таҳсил мекунанд. Аз ин теъдод танҳо 15 нафараш духтарон ҳастанд, ки ҳама дар шӯъбаҳои ғоибонаи ин донишкада мехонанд.

Қаблан дар кишвар даҳҳо мадрасаҳои динӣ амал мекард, ки сокинон метавонистанд дар он таълими динӣ гиранд. Вале баъди соли 2010 як-як онҳоро бастанд. Барои таҳсили ғайрирасмии динӣ то кунун даҳҳо шаҳрвандони кишвар муҷозот шудаанд.

Ҳамчунин, баъди пайвастани наздик ба 2 ҳазор нафар шаҳрванди Тоҷикистон ба сафи гурӯҳи тундрави “Давлати исломӣ”* мақомоти тоҷик мубориза бо таҳсили ғайриқонунии динӣ дар дохилу хориҷиро ҷоннок кардаанд. Ин буд, ки шурӯъ аз соли 2011 ба баргардонидани нафароне оғоз карданд, ки дар хориҷа ба таҳсили динӣ машғул буданд.

Мақомот мегӯяд, барои идома таҳсили онҳо дар Тоҷикистон шароит фароҳам овардааст, аммо коршиносон таъкид мекунанд, ки на ҳамаи онҳое, ки аз хориҷа баргардониданд, ба таҳсил фаро гирифта шуданд.

Дар Telegram, Facebook ва Instagram бо мо бимонед.