Рӯзи маъюбон ҳамасола дар Тоҷикистон 8-уми июл таҷлил мешавад. Мақсад аз он ҷалби таваҷҷуҳи ҷомеа ба масоили маъюбият, инчунин таъмини кафолатҳои иҷтимоӣ ва шароити арзандаи зиндагӣ барои шахсони маъюб мебошад.

Ҳукумати Ҷумҳурии Тоҷикистон, Хазинаи кӯдаконии Созмони Милали Муттаҳид (ЮНИСЕФ) ва шарикон аз ҷомеаи шаҳрвандӣ ду сол қабл – рӯзи 16-уми июли соли 2018 Маъракаи миллӣ оид ба фарогирии масоили маъюбиятро оғоз бахшиданд.

Ин маърака таҳти шиори “Ҳар яки мо – тавоно!” ҷараён гирифта, зимнан таъкид гардид, ки ҳар як узви ҷомеаи Тоҷикистон барои субот, муттаҳидӣ ва инкишоф саҳми арзандаи худро гузошта метавонад. Ҳадаф аз роҳандозии он ташвиқи эҳтиром ба ҳуқуқ ва шаъну шарафи кӯдакон, занон ва мардони маъюб, коҳиши доғгузорӣ ва рафъи тасаввуроти ғалат дар бораи маъюбӣ, инчунин бунёди ҷомеаи фарогир бо имконот барои ҳамагон мебошад.
Тоҷикистон дар моҳи марти соли 2018 Конвенсия оид ба ҳуқуқи маъюбонро ба имзо расонид, ки он барои дигаргуниҳои мусбат дар соҳаҳои қонунгузорӣ ва сиёсат заминаи мусоид фароҳам оварда, пешбурд ва ҳифзи ҳуқуқи шахсони маъюбро таъмин мекунад. Маъракаи мазкур ба дастгирии ташаббусҳои Ҳукумати Ҷумҳурии Тоҷикистон дар амалисозии Конвенсия оид ба ҳуқуқи маъюбон равона шудааст.

Ин маърака дар доираи “Барномаи миллии тавонбахшии шахсони маъюб барои солҳои 2017-2020” ҷараён гирифта, барои бунёди ҷомеаи фарогири иҷтимоӣ мусоидат мекунад.

Аз рӯйи натоиҷи маъракаи мазкур падид омадани чунин тағйирот интизор меравад:

• Дониши мардум оид ба маъюбият беҳтар шуда, тасаввуроти ғалат ислоҳ мешаванд;

• Дар зеҳни ҳамаи аъзои ҷомеа – кӯдакон, ҷавонон ва калонсолони бидуни маъюбият муносибати мусбат ба шахсони маъюб ташаккул меёбад;

• Ҷомеа мусоидат мекунад, ки бовари кӯдакони маъюб ба тавонмандии худ бештар шуда, онҳо бо фарогирии малакаҳои зарурӣ барои рушд имкон меёбанд;

• Муносибати манфӣ нисбат ба шахсони маъюб коҳиш ёфта, монеаҳое бартараф мешаванд, ки ба саҳмгузории онҳо дар ҳаёти ҷомеа халал мерасонанд;

• Қобилияти волидайни кӯдакони маъюб инкишоф ёфта, онҳо метавонанд дар бораи нигоҳубини беҳтари фарзандони худ берун аз муассисаҳои интернатӣ тасмим бигиранд.

Дар ҷараёни ин маъракаи иттилоотӣ матолиби гуногуни расонаӣ, аз ҷумла, барномаҳои телевизионӣ ва радиоӣ, наворҳои иҷтимоӣ, силсилаи мақолаҳо барои сомонаю рӯзномаҳо, инчунин саҳифаи мавзӯӣ дар Facebook таҳти унвони “Ҳар яки мо – тавоно!”, филмҳои тасвирӣ ва китобчаҳо барои кӯдакон, лавҳаю овезаҳо ва ғайра таҳия шуданд. Онҳо ба доираи васеи мухотабон дар Тоҷикистон тавассути телевизиону радиоҳои гуногуни давлатию хусусӣ, матбуоти даврӣ ва торнамою шабакаҳои иҷтимоӣ, ҳамчунин зимни чорабиниҳо оид ба сафарбаркунии ҷомеа пешниҳод гардиданд.

Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед. 

Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.