Барои беҳбуди сифати хидматрасонӣ барои сайёҳон дар нимсолаи дуюми соли 2024 вазъи иншооти сайҳӣ дар минтақаҳо мавриди омӯзиш ва таҳлил қарор мегирад.
Дар ин бора зимни нишасти матбуотии рӯзи 5 август раиси Кумитаи рушди сайёҳии ҷумҳурӣ Камолиддин Муминзод изҳори назар кард.
Қобили зикр аст, ки қаблан дар ҷаласаи гуруҳи кории ҷумҳуриявӣ оид ба рушди сайёҳӣ дар Хуҷанд ҳам Муминзода гуфта буд, ки барои ҷалби сармоягузорӣ ба соҳаи сайёҳӣ зарур аст, ки ҳолати иншоот ҳамчун “қаноатбахш”, “таъмирталаб” ё “партофташуда” баҳогузорӣ шавад.
Дар ин робита хабарнигори «Азия-Плюс» дар нишасти матбуотӣ чунин савол дод: «Оё ин кор дар давоми се сол - аз соли 2019 то 2021, вақте ки дар кишвар солҳои сайёҳӣ эълон шуда буданд, иҷро нашуд?».
Ҷавоби дақиқ ба савол садо надод. Раиси Кумита зикр кард, ки дар ин давра «корҳои назаррас анҷом дода шуданд: 1450 иншооти зерсохтори сайёҳӣ сохта ва ба истифода дода шуданд».
Ӯ мушаххасан дар бораи ин иншоот чизе нагуфта, танҳо зикр кард, ки «бо рӯйи кор омадани мушкилот бояд баҳри рафъи он чораҳо андешида шаванд».
«Ҳоло вақти ҷалби сармоягузориҳои бузург ба соҳаи сайёҳӣ фаро расидааст», - илова кард Муминзода.
Ба саволи дигари хабарнигори «Азия-Плюс» дар бораи таксиҳо барои хатсайрҳои сайёҳон ба минтақаҳо низ ҷавоби дақиқ дода нашуд.
Мо пурсидем, ки оё дар Кумита барои ба роҳ мондани таксиҳо барои истифодаи сайёҳон чораҳо андешида мешаванд, зеро сайёҳон бо таваккал (метавонад хатарнок бошад) аз хидматрасониҳои таксиҳо хусусӣ истифода мекунанд. Ва оё ин масъала, масалан, бо Вазорати нақлиёт баррасӣ шудааст?
Муминзод посух дод, ки “роҳандозии таксиҳо барои сайёҳон кори бахши хусусӣ аст”.
«Барои дастгирӣ ва рушди соҳаи сайёҳӣ ҳукумати ҷумҳурӣ имтиёзҳои назаррас пешниҳод кардааст. Яке аз онҳо коҳиши 50-фоизаи боҷи гумрукӣ барои воситаҳои нақлиёте мебошад, ки бо мақсади хидматрасонӣ ба сайёҳон ворид карда мешаванд. Соҳибкорон аз имтиёзҳои пешниҳодшуда барои таъсиси тиҷорати зарурӣ истифода мебаранд. Ҳукумат бо бахши хусусӣ фаъолона ҳамкорӣ хоҳад кард, ки ба ҳалли ин масъала дар оянда кумак хоҳад кард», - гуфт ӯ.
Роҳбари кумита инчунин хабар дод, ки дар шаш моҳи аввали соли ҷорӣ 748,3 ҳазор шаҳрванди хориҷӣ аз Тоҷикистон боздид кардаанд, ки 580,5 ҳазор нафар ҳамчун сайёҳ омадаанд. Ин нишондиҳанда нисбат ба ҳамин давраи соли гузашта 19,1% зиёд аст.
Дар нимсолаи аввали соли ҷорӣ Тоҷикистон бо кишварҳои гуногун 20 созишномаи байналмилалӣ дар соҳаи сайёҳӣ ба имзо расонидааст, ки ба рушди сайёҳии тиббӣ, экологӣ ва кӯҳӣ равона шудаанд.
Бино ба маълумоти Муминзод, ҳоло бо дастгирии ҳукумати ҶТ ва шарикон якчанд лоиҳаҳои сармоягузорӣ дар соҳаи сайёҳӣ амалӣ мешаванд.
Яке аз чунин лоиҳаҳо, ки аз ҷониби Бонки осиёии рушд дар ҳаҷми 10 млн доллар маблағгузорӣ мешавад, ба омодасозии лоиҳаҳо барои рушди сайёҳӣ равона шудааст.
Руcский