Вазорати маориф ва илми кишвар дар пайи шикояти бархе волидайн дар бораи хариди иҷбории сару либоси мактабӣ гуфт, ин ниҳод масъалаи харидории либоси мактабиро ба танзим намедарорад ва коргоҳу корхонаи дӯзандагӣ надорад.

Ин ниҳод бо пахши як изҳорот афзуд, падару модарон метавонанд аз дилхоҳ нуқтаи фурӯш сару либоси мактабӣ харанд.

Бо оғози соли хониш ва мавсими хариди сару либоси мактабӣ шикояти сокинони кишвар дар бораи он ки масъулини мактабҳо онҳоро барои хариди либоси мактабӣ ба коргоҳу корхонаи дӯзандагии махсус равон мекунанд, зиёд шуданд.

Вазорати маориф ва илми кишвар гуфтааст, ки онҳо танҳо ранг ва намуди либоси мактабиро тавсия додаанд, на коргоҳу корхонаи дӯзандагиро.

Дар вокуниш гуфта мешавад, вазорат барои дастрас намудани либоси мактабӣ харидории маҳсулоти ватаниро тавсия додааст, вале дар сурати қонеъ набудан аз дилхоҳ ҷой харидории он иҷозат аст.

"Дастурамали либосҳои тавсиявии хонандагон, донишҷӯён ва омӯзгорони муассисаҳои таълимии Ҷумҳурии Тоҷикистон", ки соли 2006 пешниҳод шудааст, танҳо тавсия барои ба танзим даровардани раванди пӯшидани либоси мувофиқ аст ва барои такмили тарбияи ахлоқӣ ва маънавии онҳо нақши муҳим мебозад”, - омадааст дар вокуниш.

Қаблан вазорат дар бораи чӣ гуна ҷувздон ва пояфзол доштани хонандагони муассисаҳои таълимии кишвар мавҷуд набудани ягон дастурамал ё тавсияро тасдиқ карда буд. Дирӯз бошад вазорат гуфт, пӯшидани тоқӣ барои духтарон дар мактабҳо низ маҷбурӣ нест.

Дар оғози мавсими хариди сару либоси мактабӣ хабарнигори "Азия-плюс" аз ярмаркаҳои мактабӣ дар шаҳри Душанбе дидан ва нархи онҳоро муқоиса карда буд.

Дар Telegram, Facebook, Instagram, OK ва ВК бо мо бимонед.