Сокинони Тоҷикистон дар моҳи маррт 15 рӯз истироҳат хоҳанд кард. Дар ин бора аз Федератсияи иттиқофҳои касабаи мустақили Тоҷикистон ба "Азия-Плюс" хабар доданд.
Ин моҳ шаҳрвандони кишвар бо таваҷҷуҳ ба ҷашнҳо, аз ҷумла, "Рӯзи модар" ва ҷашни "Наврӯз", инчунин, бо дар назар гирифтани рӯзҳои ғайрикорӣ 15 рӯз истироҳат мекунанд.
Бар асоси Қонуни кишвар "Дар бораи рӯзҳои ид", агар ҷашни расмии давлатӣ ба рӯзи истироҳат (шанбе ё якшанбе) рост ояд, пас рӯзи кории баъдӣ низ рӯз истироҳат мешавад.
Ба ин тартиб, Рӯзи модар, ки дар кишвар 8 март таҷлил мешавад, ба рӯзи шанбе рост меояд, бино бар ин, сокинон рӯзҳои 8, 9 ва 10 март таътил хоҳанд дошт.
Ҳамчунин, рӯзҳои расмии истироҳат дар Наврӯз 21, 22, 23 ва 24 март мебошанд. Азбаски 22-23 март рӯзҳои шанбе ва якшанбе ҳастанд, рӯзҳои 25 ва 26 март низ истироҳат хоҳад буд.
Ҳамин тариқ, сокинони Тоҷикистон дар моҳи март бо шумули рӯзҳои истироҳат ва ҷашнҳо 15 рӯз истироҳат хоҳанд кард: 1, 2, 8, 9, 10, 15, 16, 21, 22, 23, 24, 25, 26, 29, 30 март.
Илова бар ин, моҳи Рамазон низ моҳи март оғоз гардида, охири ин моҳ анҷом меёбад. Ҳарчанд ҳоло сана оғозу анҷоми моҳи Рамазон дақиқ нест, аммо дар сурати ба 30-юми март рост омадани Иди Рамазон, рӯзи 31-уми март ҳам истироҳатӣ хоҳад буд. Аммо ин ҳоло расман тасдиқ нашудааст.
Руcский