Дар роҳҳои байнишаҳрии Тоҷикистон асбоби суръатсанҷ (радар) ва дурбинҳои назоратӣ насб мекунанд, ки ҳадафи он коҳиши садамаҳои нақлиётӣ будааст.

Суръатсанҷҳои муосир ва дурбинҳои назоратӣ аллакай дар роҳҳои сермошини кишвар, аз қабили роҳи Душанбе – Ҳисор, Душанбе - Ваҳдат, Душанбе - Бохтар насб шудаанд ва фаъол мебошанд.

Суръатсанҷҳо ва дурбинҳои назоратӣ дар чаҳорчӯби лоиҳаи NERU бо мақсади мусоидат дар таъмини бехатарии ҳаракат дар роҳ ва кам кардани садамаҳои нақлиётӣ насб карда мешавад.

Роҳҳои байнишаҳрии кишвар аз ҷумлаи хатарноктарин дониста мешавад. Дар ин роҳҳо ҳар сол даҳҳо ҳодисаи нохуш сабт мешавад, ки дар аксари ҳолатҳо боиси ҳалокати инсонҳо мегардад.

Аз ҷумла, чанде пештар дар шоҳроҳи Душанбе-Ҳисор дар пайи садамаи нақлиёт як кӯдаки ҳаштсола ба ҳалокат расид. Дар шоҳроҳи Душанбе-Бохтар як мошини боркаш ба 7 мошини дигар бархӯрд ва 8 нафар ба ҳалокат расидаанд.

Бино ба маълумоти Вазорати корҳои дохилии Тоҷикистон, танҳо дар соли гузашта дар кишвар бар асари садамаҳои нақлиётӣ 552 нафар кушта ва садҳо тан ҷароҳат бардоштаанд. Яъне ҳар рӯз як-ду кас дар натиҷаи садамаи нақлиёт ҷон медиҳанд.

 

Чӣ тавр система кор мекунад

Суръатсанҷҳо ва дурбинҳои назоратӣ суръати баландшавӣ, ҳаракат ба самти муқобил ва дигар қоидавайронкуниҳои хатарнокро сабт мекунанд. Маълумоти ҷамъшуда на танҳо барои вокуниши фаврӣ ба ҳодисаҳо, балки инчунин барои таҳлили мунтазами сабабҳои садама, эҷоди инфрасохтори бехатар имкон медиҳад.

Лоиҳаи NERU дар ҳамкорӣ бо мақомоти давлатӣ амалӣ карда мешавад ва ҳадафи он эҷоди низоми муосири бехатарии ҳаракат дар роҳ мебошад.

Ҳамакнун, ронандагон маҷбуранд қоидаҳои ҳаракат ва меъёри суръатро дар роҳҳои байнишаҳрӣ низ риоя кунанд. Дар ҳолати ғайр ҷарима хоҳанд шуд.

Дар Telegram, Facebook ва Instagram бо мо бимонед.