Як ҷавони мусаллаҳ дар бахши фалсафаи Донишгоҳи Карли Чехия дар маркази Прага беш аз 15 нафарро кушта, 24 каси дигарро захмӣ кард. Худи ҳамлавар низ ҷон бохтааст, аммо ҳоло дақиқ нест, ки ӯ худкушӣ кардааст ё аз тири пулис кушта шудааст.

Ба иттилои нашрияи чехии Novinky.cz рӯзи 21-уми декабр Дэвид Козаки 24-сола бо туфанг ба донишгоҳ омада, ба сӯи мардум тир холӣ кардааст. Ӯ донишҷӯи ин донишгоҳ аз шаҳри Кладно, воқеъ дар 30-километрии Прага будааст.

Пулиси Чехия ин ҷавонро дар куштори падараш, ки чанд рӯз пеш аз тирпаронӣ мурда пайдо гардидааст, низ гумонбар медонад.

Вазири умури дохилии Чехия, Вит Ракусан, рӯзи 21-уми декабр дар суҳбат бо хабарнигорон ҳодисаро “фоҷиаи бузург” номида, аммо гуфтааст, “тирандозӣ бо терроризми байнулмилалӣ пайванд надорад”.

Раиси шаҳри Прага Боҳуслав Свобода гуфтааст, ки ҳамлавар ҳангоми сарозер шудан аз бино ҷон бохт, аммо расонаҳо аз қавли шоҳидон навиштаанд, ки ӯ аз тири пулис кушта шудааст.

Сабаби даст ба куштор задани ин ҷавон маълум нест.

Дар робита ба ин ин ҳодиса, рӯзи 23-юми декабр дар Чехия мотами миллӣ эълон шудааст.

Дар Telegram, Facebook, Instagram, OK ва ВК бо мо бимонед.