Бонки осиёии рушд (БОР) грант ба маблағи 30 млн долларро барои тақвияти идоракунии хавфҳои офатҳои табиӣ дар Тоҷикистон маъқул шуморид.
Тавре ки дар хабари БОР зикр мешавад, қисмате аз ин маблағ барои истифода ҷиҳати коҳиши талафоти иқтисодӣ бар асари тағйирёбии иқлим ва офатҳои табиӣ ба нақша гирифта шудааст.
“Тоҷикистон ба тағйирёбии иқлим ниҳоят осебпазир аст: ҳамасола беш аз 400 офатҳои табиӣ, аз қабили обхезӣ, тарма ва ғайра рух медиҳанд, ки ба ҳаёти мардум ва иқтисодиёт таъсири ҷиддӣ мерасонанд”, - гуфтааст директори генералии БОР оид ба Осиёи Марказӣ ва Ғарбӣ Евгений Жуков.
Ӯ зикр кард, ки гранти БОР омодагии кишварро ба офатҳои табиӣ баланд бардошта, ба иқтидори вокуниш дар баробари таҳкими устувории умумӣ ба тағирёбии иқлим таҳким мебахшад.
Дар хабар таъкид мешавад, ки лоиҳа ба гранти ҷории 10 млн доллар, ки аз ҷониби бонк дар соли 2018 барои идоракунии хатари офатҳои табиӣ дар банақшагирии рушд тасдиқ шудааст, илова мешавад.
Гуфта мешавад, гранти иловагӣ иқтидори Кумитаи ҳолатҳои фавқулода ва мудофиаи гражданӣ, агентии иҷрокунандаи лоиҳаро барои идоракунии офатҳои табиӣ тақвият хоҳад дод.
Интизор меравад, ки кумак инчунин воситаҳои пешгӯии обу ҳаво ва офатҳои табииро беҳтар сохта, низоми иловагии огоҳии барвақтиро таъсис диҳад.
“Офатҳои табиӣ одамонро аз воситаҳои пешбурди рӯзгор маҳрум карда, онҳоро ба тарки манзил водор мекунад. Лоиҳаи БОР дар бунёди манзилҳои тобовар ба офатҳои табиӣ, таҳкими иқтидори ҷамоатҳои маҳаллӣ ва мансабдорон ва беҳтар кардани иншооти аксуламал ба офатҳои табиӣ дар вилояти Хатлон кӯмак хоҳад кард”, - гуфтааст иқтисодчии БОР оид ба захираҳои табиӣ ва бахши кишоварзӣ Матиас Ляйтнер.
Дар хабар зикр мегардад, ки манзилҳои истиқоматӣ ба иқлим тобовар, бо об ва нерӯи барқи боэътимод ва иншоот барои занон, кӯдакон ва маъюбон таъмин хоҳанд буд.
Лоиҳа инчунин зерсохтори иҷтимоиро дар деҳаҳои ҳамсоя, аз ҷумла роҳҳои даромадгоҳ, пул, хатҳои барқ, марказҳои саломатӣ ва мактабҳоро беҳтар мекунад.
Ҷамоаҳои маҳаллӣ ва одамони муҳоҷир дар мавзӯъҳои инноватсия дар соҳаи кишоварзӣ ва зироатпарварӣ, инчунин малакаҳои гуфтушунидҳо барои баланд бардоштани даромад ва устувории ҷомеа таълим мегиранд.
Бонки осиёии рушд мададрасони асосии молиявии Тоҷикистон маҳсуб ёфта, аз соли 1998 ба кишвар ба маблағи зиёда аз 2,5 млрд доллар, аз ҷумла 1,9 млрд доллар ба сифати грант кумак кардааст.
Руcский