Бар асари пандемияи корнавирус нимсолаи ааввали соли 2020 иҷрои нақшаи ҷамъоварии андози иҷтимоӣ дар Тоҷикистон таъмин нашуд. Дар ин давра ба буҷети Агентии суғуртаи иҷтимоӣ ва нафақаи ҷумҳурӣ 192,2 млн сомонӣ камтар маблағ ворид шуд, ки тақрибан ба ҳаҷми солонаи нафақаи зиёда аз 53 ҳазор кас баробар аст.

Директори Агентии суғуртаи иҷтимоӣ ва нафақаи назди ҳукумати Тоҷикистон Дилмурод Давлатзода имрӯз ба журналистон изҳор дошт, ки 53 шаҳру навоҳӣ иҷрои қисмати даромади буҷети суғуртаи иҷтимоӣ ва нафақаро таъмин карда натавонистаанд.

Бо назардошти 303 сомонӣ будани нафақаи миёна дар ҷумҳурӣ, ки ба ҳар кас дар як сол наздики 3,6 ҳазор сомониро ташкил медиҳад, ин нишондиҳанда ба нафақаи солонаи наздики 53 ҳазор нафар нафақахӯрон баробар мешавад.

Нишондиҳандаҳои иҷрои нақша дар ин самт дар шаҳри Душанбе 87,6%, вилояти Суғд - 87,9%, Хатлон - 84,6%, ВМКБ - 96,2% ва Ноҳияҳои тобеи марказ - 83,9%-ро ташкил додаанд.

Бино ба маълумоти Кумитаи андоз, ба ҳолати 1 июни соли 2020 аз рӯйи пардохти нафақаи иҷтимоӣ 212,3 млн сомонӣ қарз вуҷуд дорад, ки дар муқоиса бо нишондиҳандаи аввали сол 50,6 млн сомонӣ ё худ 32,6% зиёдтар аст.

Тибқи маълумоти пешакии Агентии суғуртаи иҷтимоӣ ва нафақа, дар 6 моҳи соли равон шумори нафақахӯрон дар Тоҷикистон 22 ҳазор нафар афзуда, ба 722,7 ҳазор нафар расидааст.

Талаботи умумӣ ба пардохти нафақа давоми 6 моҳи соли равон 1 млрд 415,7 млн сомониро ташкил дода, то 9 июл 1 млрд 259 млн сомонӣ нафақа пардохт шудааст.

Дар робита ба иҷро нашудани нақшаи ҷамъоварии андози иҷтимоӣ, аз маблағҳои мутамарказ ба минтақаҳо дар ҳаҷми зиёда аз 323 млн сомонӣ кумак расонида шудааст.

Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед. 

Дар Telegram, Facebook, Instagram, Viber, Яндекс.ДзенOK ва Google Новости бо мо бимонед.