Душанбе. 1-уми август. ОИ «Азия-Плюс» - Дар таърихи 3-5 август дар Исломобод конфронси чаҳоруми иштирокчиёни лоиҳаи бозори нерӯи барқи Осиёи Марказӣ ва Осиёи Ҷанубӣ доир мегардад.

Аз ширкати саҳомии холдингии кушодаи «Барқи тоҷик» хабар доданд, ки иштирокчиёни лоиҳаи CASAREM (Покистон, Афғонистон, Қирғизистон ва Тоҷикистон) ният доранд, лоҳаи сохтмони хати интиқоли барқи Осиёи Марказӣ-Осиёи Ҷанубӣ-1000 ва рушди минбаъдаи бозори энергетикии ин минтақаро   ба имзо расонанд.

Ёдовар мешавем, ки моҳи ноябри соли гузашта дар Кобул Тоҷикистону Афғонистон ва Покистону Қирғизистон Ёддошти тафоҳуми таъсиси хатҳои интиқоли барқи миёни Осиёи Марказӣ ва Ҷанубиро ба имзо расониданд. Ёддошти мазкур сохтмони хати интиқоли барқ аз Тоҷикистону Қирғизистон ба Покистонро пешбинӣ мекунад.

Дар ҳамин ҳол, тибқи иттилои вазорати энергетика ва саноати Тоҷикистон, дар Исломобод ҳамчунин бо ташаббуси Бонки рушди Осиё масъалаи созишномаи нерӯи барқи Тоҷикистонро харидорӣ намудани Афғонистон низ баррасӣ хоҳад шуд. Афғонистон хостори он аст, ки нерӯи барқро бо нархи 1 сент харидорӣ намояд, вале Тоҷикистон нархи онро 3,5 сент муқаррар кардааст.

Тибқи лоиҳаи харидории нерӯи барқи Тоҷикитон аз ҷониби Афғонистон сохтмони хати итиқоли барқи 220 кВ «Сангтӯда-1-Пули Хумрӣ» ба нақша гирифта шудааст, ки ҷиҳти бунёди он Бонки рушди Осиё тақрибан 22-23 миллион доллари амрикоӣ сарф карданист. Мувофиқи муқаррароти созишнома, сохтмони хати интиқоли барқ, ки 120 км дарозӣ дорад, моҳи октябри соли   ҷорӣ оғоз гардида, баҳори соли 2010 ба истифода дода мешавад. Дар давоми солҳои 2010-2015 интиқоли барқ танҳо дар давраи тобистон сурат хоҳад гирифт ва бо мавриди истифода қарор додани нерӯгоҳи обию барқии «Роғун» он муддати тамоми сол амалӣ хоҳад гашт.