Шоҳроҳи Душанбе-Хуҷанд аз тармаву барфреза тоза карда шуд, ҳаракати воситаҳои нақлиёт тариқи он барқарор шуд, хабар доданд ба “Азия-Плюс” аз филиали ширкати IRS дар Тоҷикистон.

“Роҳ шоми 13 март баста шуда, нимаи дирӯз ба як самт ва шомгоҳон ба ҳар ду самт боз шуд, - хабар доданд аз дафтари матбуоти филиали ширкат. -  Дар зарфи 2 рӯз дар қитъаҳои гуногуни роҳ - аз километри 62 то 87-ум қариб 20 тармаи хурду калон фаромад, ки баландиашон зиёда аз 10 метрро ташкил медод”.

Тибқи маълумоти филиали ширкат, барои роҳ надодан ба танбашавии воситаҳои нақлиёт ҳаракати автомашинаҳои боркаш маҳдуд аст.

“Роҳ бо маводи реагент коркард шуда, лекин дар қитъаҳои ҷудогона боридани барф идома дорад, - гуфт манбаъ. - Барои маҳдуд насохтани ҳаракати дигар навъи воситаҳои нақлиёт ва роҳ надодан ба ҳолатҳои танбашавӣ, ҳаракати автомашинаҳои боркаш бо ядак (притсеп) ва мошинҳои боркаши бузургҳаҷм (фура) маҳдуд аст”.

Сурат: IRS

Дар IRS ҳамчунин гуфтанд, хатари тармафароӣ ҳоло ҳам вуҷуд дошта, аз ронандагон дархост мешавад, ки эҳтиёткор бошанд.

“Аз ронандагон дархост мекунем, ки ҳамдигарро эҳтиром намуда, ба танбашавии автомашинаҳо роҳ надиҳанд, - изҳор дошт манбаъ. - Ба дастурҳои кормандони ширкат гӯш дода, тавсияҳои КҲФ-ро ба инобат гиранд ва бе омодагӣ ба роҳ набароянд. Бахусус таъкид мекунем, ки дар сурати ба вуҷуд омадани танбашавии автомашинаҳо, техникаи ширкат ҷиҳати саривақт бартараф намудани оқибатҳои офати табиӣ саривақт ба ҷойи ҳодиса ҳозир шуда наметавонад”.

Зимнан зикр шуд, ки ба ронандагону мусофироне, ки ҳангоми басташавии роҳ дар он қарор доштанд аз ҳисоби ширкат хӯрок тақсим карда шуд.

Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед. 

Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.