Кароматулло Раҳимзода, директори пешини Филармонияи давлатии Тоҷикистон ба пулшӯӣ ба маблағи беш аз 800 ҳазор сомонӣ муттаҳам шуда, нисбаташ парвандаи ҷиноӣ ифтитоҳ гардидааст. Дар ин бора Агентии зиддифасоди Тоҷикистон хабар медиҳад.
Ба гуфтаи манбаъ, Кароматулло Раҳимзода ин кирдорро бо кумаки сармуҳосиби муассиса Баҳриддинов С.С. ва соҳибкор Якубов Ш.А. анҷом додааст ва номбурдагон шарикони ин амали ҷиноятӣ ҳисоб мешаванд.
Гуфта мешавад, Раҳимзода аз 20-уми феврали соли 2020 то 19-уми сентябри соли 2023 дар вазифаи директори Филармонияи давлатии Тоҷикистон ба номи Акашариф Ҷӯраев кору фаъолият карда, дар ин муддат “бо истифода аз ваколати мансабӣ ва дар асоси маслиҳати пешакӣ бо дигар шахсон” ба пулшӯӣ даст задааст.
“...маблағҳои барои пардохти музди меҳнат, гузаронидани чорабиниҳои фарҳангӣ, мукофотпулиҳо ва дигар хароҷотҳои Муассиса пешбинишударо, ки дар ихтиёрдориашон қарор дошт, давра ба давра бо роҳи сохтакории ҳуҷҷатҳои муҳосибӣ, ҷамъ ба маблағи 834 ҳазору 441 сомониро бо роҳи азонихудкунӣ тасарруф намуда, ба эҳтиёҷоти шахсиашон сарф карданд”, - навиштааст Агентии зиддифасоди Тоҷикистон.
Таъкид гардидааст, ки гумонбарон бо ин “кирдори қасдонаи худ ба давлат зарари махсусан калони моддӣ расониданд”. Дар ҳамин ҳол, афзуда мешавад, ки дар рафти тафтиши пешакӣ зарари ба давлат расонидашуда пурра барқарор гардидааст.
Кароматулло Раҳимов пештар аз ин директори Мактаби мусиқии ба номи Миратулло Атоев буд ва бо фармони вазири пешини фарҳанги кишвар Зулфия Давлатзода роҳбари Филармонияи давлатии Тоҷикистон таъйин гардида буд.
Нисбати директор ва сармуҳосиби пешини Филармонияи давлатии Тоҷикистон Кароматулло Раҳимзода ва Баҳриддинов С.С. бо моддаҳои 245, қисми 4, банди “б” ва 323-и Кодекси ҷиноятӣ парванда боз шудааст.
Алайҳи соҳибкор Якубов Ш.А. бо моддаҳои 36, қисми 5 ва моддаи 245, қисми 2, бандҳои “а”, “г”-и Кодекси ҷиноятӣ парванда ифтитоҳ гардидааст.
Назари гумонбаршавандагон ба мо дастрас нест. Ғайр аз ин, маълум нест, ки соҳибкор Якубов ба ин кирдор чӣ пайвандӣ ё иртибот дорад.
Дар ҳамин ҳол, моддаи 245, қисми 4, банди “б”-и Кодекси ҷиноятӣ “азонихудкунӣ ё исрофкорӣ ба миқдори махсусан калон содир шуда” аст, ки аз 1 ҳазору 824 то 2 ҳазору 800 нишондиҳанда барои ҳисобҳо ҷарима ё аз 10 то 15 сол зиндонро пешбинӣ кардааст.
Моддаи 323-и Кодекси ҷиноятӣ “сохтакории хизматӣ” аст, ки аз 250 то 365 нишондиҳанда барои ҳисобҳо ҷарима ё аз 1 то 2 сол зиндонро пешбинӣ мекунад.
Моддаи 36, қисми 5-и Кодекси ҷиноятӣ “ёрдамчӣ шахсе эътироф мешавад, ки бо маслиҳату дастур, додани маълумот, восита ё олоти содир кардани ҷиноят ё рафъи монеаҳо ба содир намудани ҷиноят мусоидат кардааст” ва моддаи 245, қисми 2, бандҳои “а”, “г”-и Кодекси ҷиноятӣ такроран ва бо истифодаи ваколати мансабдорӣ дар азонихудкунӣ ё исрофкориро пешбинӣ мекунад.
Ҳоло ин се парвандаи ҷиноятӣ баъди анҷоми тафтиши пешакӣ барои моҳиятан баррасӣ намудан ба суд ирсол гардидааст.
“Ғайриқонунӣ ҳузур доред? Русияро тарк кунед!” Шарҳи моҳияти қонунҳои нав
“Дар шаҳр бисёр гӯшт мехӯранд”. Масъулин сабаби боло рафтани нархи гӯштро гуфтанд
“Обро қатъ карда, шахси ғарқшударо меҷӯем”. КҲФ ҷасади киро ҷустуҷӯ дорад?
“Дарвозаҳои электронӣ”-и Фурудгоҳи Душанбе. Чаро он кор намекунад?
Дар Москва ба муносибати рӯзи мавлуди Ибни Сино конфронси байналмилалӣ баргузор мешавад
“Мушкили молӣ буд”. Раиси шаҳри Хуҷанд гуфт, автобусҳо дубора ба кор оғоз карданд
ЮНИСЕФ: Афзоиши гармо дар саросари Аврупо ва Осиёи Марказӣ ҳамасола боиси фавти қариб 400 кӯдак мегардад
Додситонии Кӯлоб нисбати кормандони комиссариатҳои ҳарбӣ 3 парвандаи ҷиноятӣ боз намуд
“Аудиокитоб” бо Субҳон Ҷалилов. Маснавии маънавӣ. Ҳикояи “Котиби ваҳй”
Тоҷикистон аз Русия 27 вагони мусофирбар харид
Кулли ахбор
Авторизуйтесь, пожалуйста