Қарзи хориҷии Тоҷикистон дар аввали нимсолаи дуюми соли равон 35,9% аз ҳаҷми Маҷмӯи маҳсулоти дохилии кишварро ташкил додааст.

Ҳаҷми умумии қарзҳои ҷалбшуда аз Чин барои амалисозии лоиҳаҳои давлатии сармоягузорӣ ба ҳудуди 1 млрд. 525 млн. доллар баробар аст. Дар ин бора муовини раиси Маҷлиси намояндагони Маҷлиси Олии ҶТ Акрамшо Фелалиев рӯзи 25-уми октябр зимни мулоқот бо намояндагони расмии шаҳри Сямени Чин иброз дошт.

Вай афзуд, ки ҳукумати Чин тӯли 24 соли охир барои татбиқи лоиҳаҳои рушди иқтисоди Тоҷикистон, аз ҷумла, таҷдиди роҳҳои байнулмилалии нақлиётӣ, дастрасӣ ба нерӯи барқ ва ғайра мусоидат кард.

Фелалиев гуфтааст, ки сармоягузории ҳукумати Чин ба иқтисоди Тоҷикистон тавассути Бонки содироту воридоти ин кишвар (Эксимбонк) сурат мепазирад.

Ба қавли ӯ, аз ҳисоби қарзҳои ҳукумати Чин ҳашт лоиҳа ба маблағи умумии 1 млрд. 15 млн. доллар амалӣ шудааст.

Аз ҷумлаи ин лоиҳаҳо «Хати интиқоли барқи 500кВ «Ҷануб-Шимол», «Хати интиқоли барқи 220кВ «Лолазор-Хатлон», «Сохтмони хати интиқоли барқи 220 кВ «Ҳуҷанд – Айнӣ», «Таҷдиди зеристгоҳи «Регар – 500 Кв», «Созмон додани шабакаи ягонаи шимоли Тоҷикистон», «Системаи автоматикунонии идораи нақлиёти шаҳри Душанбе», «Таҷдиди роҳи автомобилгарди Душанб – Чаноқ» ва «Таҷдиди роҳи автомобилгарди Душанбе – Данғара» мебошанд.

Фелалиев зикр кард, ки айни замон бо қарзҳои ҳукумати Чин се лоиҳа ба маблағи умумии наздики 510 млн. доллар татбиқ мешавад.

Бино ба маълумоти Вазорати молияи ҶТ, қарзи берунаи Тоҷикистон дар аввали нимсолаи дуюми соли ҷорӣ ҳудуди 2,9 млрд. долларро ташкил медиҳад, ки 35,9%-и ҳаҷми Маҷмӯи маҳсулоти дохилии кишвар аст. Дар сохтори қарзи хориҷии Тоҷикистон беш аз 1,5 млрд. (ҳудуди 52%) доллараш ба қарзҳои ҳукумати Чин рост меояд.

Аввали моҳи августи соли ҷорӣ вазири молияи Тоҷикистон Файзиддин Қаҳҳорзода зимни нишасти хабарӣ дар Душанбе изҳор дошт, ки “дар соли минбаъдаи молиявӣ (солҳои 2019-2020) мо бештар ба ҷалби грантҳо манфиатдорем, то ки ҳаҷми қарзҳо зиёд нашавад”.

Дар робита ба ҳиссаи Чин дар қарзи хориҷии Тоҷикистон, вазир қайд кард, ки дар ин самт ҷумҳурӣ ба ҳамкорӣ бо ҳамаи давлатҳо омода аст.

“Мо сиёсати дарҳои бозро роҳандозӣ карда, ин ба масъалаи ҷалби захираҳои молиявӣ низ дахл дорад. Чин ё ягон кишвари дигаре бошад ҳам, мо ба ҷалби маблағҳо бо шартҳои имтиёзнок баҳри расидан ба ҳадафҳои стратегӣ манфиатдорем”, - гуфт ӯ.

Дар ҳамин ҳол, вазири молия эътироф кард, ки дар самти ҷалби сармоягузориҳо ба кишвар Чин мавқеи муҳим дорад.

Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.