Дар зарфи 10 моҳи соли равон ба Тоҷикистон аз Қазоқистон зиёда аз 1 млн тонна зироати ғалладона ворид карда шудааст, ки 11% зиёдтар нисбат ба ҳамин давраи соли гузашта аст. Дар ин бора Вазорати кишоварзии Қазоқистон хабар медиҳад.

Ин кишвар барои Тоҷикистон таъминкунандаи асосии зироати ғалладона боқӣ мемонад. Тибқи маълумоти мавҷуда, моҳҳои январ-октябри соли 2024 ҳаҷми воридот 1,02 млн тоннаро ташкил додааст. Дар ҳамин давраи соли 2023 ин нишондиҳанда ба 917,1 ҳазор тонна баробар буд.

Дар Вазорати кишоварзӣ сабаби афзоишро ба афзудани талабот ба ғаллаи хӯроквории босифат ва ҳамкориҳои муваффақонаи кишварҳо вобаста медонанд.

Аз моҳи сентябр то декабр ҳаҷми ғалладонаи ҳосили нав, ки ба ҷумҳурӣ интиқол ёфтааст, ба андозаи 51% афзуда, ба 489 ҳазор тонна расидааст. Ширкатҳои Қазоқистон, аз ҷумла ҶС «НК «Продкорпорация», стратегияи содиротии худро фаъолона пеш мебаранд, ки ин ба устувор нигоҳ доштани бозори ғалладонаи Тоҷикистон мусоидат мекунад. Ин ширкат нахустин 20 ҳазор тонна гандуми хӯроквории ҳосили навро ба Тоҷикистон фиристод.

Дар моҳи августи соли 2024 зимни сафари расмии президенти Қазоқистон ба Душанбе дар бораи интиқоли иловагии 100 ҳазор тонна гандуми ҳосили нав тавофуқ ҳосил шуд. Ғаллаи Қазоқистон маъмулан ҳам барои эҳтиёҷоти дохилӣ ва ҳам барои коркарди маҳсулоти содиротӣ истифода мешавад, ки дар иқтисоди Тоҷикистон нақши муҳим мебозад.

Афзоиши ҳаҷми воридот амнияти озуқавории кишварро таҳким бахшида, аҳаммияти стратегии Қазоқистонро ҳамчун шарики калидӣ тасдиқ мекунад.

Воридоти ғаллаи Қазоқистон натанҳо ҳамкориҳои шарикии ду кишварро таҳким мебахшад, балки барои рушди иқтисоди Тоҷикистон заминаи устувор фароҳам меорад. Таъмини тавозун байни воридоти ғалладона ва рушди кишоварзӣ дар дохил омили калидии устувории дарозмуддат барои бозори озуқавории кишвар хоҳад буд.

Устувории нархҳо дар бозори зироати ғалладона ва дастрасии озуқаворӣ аз вазифаҳои афзалиятноки ҳукумати Тоҷикистон боқӣ мемонанд. Дар ин робита ҳамкорӣ бо Қазоқистон ба ҷумҳурӣ барои ҳалли мушкилоти ҷорӣ, аз қабили тағйирёбии нархҳои ҷаҳонии зироати ғалладона ва таъсири тағйироти иқлим заминаи боэътимод фароҳам меорад.

Ба Тоҷикистон зарур аст, ки миёни воридоти ғалла ва рушди маҷмааи агросаноатии худ тавозуни устувор пайдо кунад, то ки дар шароити иқтисоди ҷаҳонии тағйирёбанда ояндаи устуворро таъмин намояд.

Талаботи солонаи Тоҷикистон ба гандум беш аз 2 млн тонна аст. Қариб нисфи ин талабот аз ҳисоби истеҳсоли дохилӣ таъмин мешавад – ҳосили солонаи гандум дар кишвар ба ҳисоби миёна тақрибан 1 млн тоннаро ташкил медиҳад. Бо сабаби афзоиши аҳолӣ, Тоҷикистон ният дорад воридоти гандумро то 1 млн 285 ҳазор тонна ва истеҳсоли гандуми дохилиро то 1 млн 32 ҳазор тонна дар як сол зиёд кунад.

Дар Telegram, Facebook ва Instagram бо мо бимонед.