Душанбе. 11-уми август. ОИ «Азия-Плюс» - Имрӯз дар шаҳри Душанбе тренинги дурӯза оид ба баланд бардоштани сатҳи касбии кормандони хадамоти махсуси Афғонистон дар мавриди мубориза алайҳи қочоқи маводи мухаддир ба кор шурӯъ кард.

Тавре ба ОИ «Азия-Плюс» аз дафтари намояндагии Раёсати Созмони Милали Муттаҳид (СММ) оид ба мубориза бар зидди гардиши ғайриқонунии маводи мухаддир ва ҷинояткорӣ дар Тоҷикистон хабар доданд, дар семинар 15 нафар намояндагони милиса, гумрукчиён ва марзбонони афғон малакаҳои мубориза алайҳи қочоқи маводи мухаддирро меомӯзанд.

            «Ба сифати омӯзгорону мураббиён кормандони Раёсати мубориза бар зидди маводи нашъаовари Вазорати адлияи Амрико ( DEA ) ва Агентии назорати маводи нашъаовари назди президенти Тоҷикистон интихоб шудаанд», - изҳор дошт манбаъ.

            Ба иттилои сарчашма, тамоми хароҷоти баргузории тренинг бар дӯши намояндагии Раёсати Созмони Милали Муттаҳид (СММ) оид ба мубориза бар зидди гардиши ғайриқонунии маводи мухаддир ва ҷинояткорӣ дар Тоҷикистон вогузор шудааст.