Душанбе. 13-уми май. Азия-Плюс —Президенти Ҷумҳурии Тоҷикистон Эмомалӣ Раҳмон Директори Бонки ҷаҳонӣ доир ба стратегия ва амалиёт дар минтақаи Аврупо ва Осиёи Марказӣ Теодор Алерс ва Директори минтақавии ин бонк доир ба кишварҳои Осиёи Марказӣ Моту Кониширо ба ҳузур пазируфт.

 Тавре аз хадамоти матуботи сарвари давлат иттилоъ доданд, дар мулоқот масоили ҳамкории дуҷониба, аз ҷумла рафти ташхиси техникӣ иқтисодии лоиҳаи сохтмони нерўгоҳи Роғун, омўзиши таъсири иҷтимоӣ- экологии ин иншоот ва дастгирии рушди иҷтимоию иқтисодии Тоҷикистон баррасӣ шуд.

 Тавре зикр гардид, натиҷаи марҳилаи аввали ташхис доир ба корҳои дар зарфи 30 соли гузашта анҷомёфта ҳафтаи равон ба Ҳукумати Ҷумҳурии Тоҷикистон пешниҳод карда шуд ва натиҷаҳои марҳилаи дуюм тирамоҳи соли равон омода хоҳад шуд.

 Иттилоъ дода шуд, ки ҷанбаҳои гуногуни лоиҳаи нерўгоҳи Роғун ва натиҷаҳои марҳилаи аввали ташхиси он зимни нишасти намояндагони ҳукуматӣ ва аҳли ҷомеаи кишварҳои минтақаи Осиёи Марказӣ ва Афғонистон, ки ҳафтаи оянда аз ҷониби Бонки ҷаҳонӣ дар шаҳри Алматои қазоқистон доир мегардад,  баррасӣ хоҳад шуд. Ба гуфти Теодор Алерс, ҳадаф аз ташхиси ҳамаҷонибаи лоиҳаи бунёди нерўгоҳи Роғун ва ҳам муҳокимаи ин мавзўъ бо ҳамаи ҷонибҳои манфиатдор «дарёфти беҳтарин роҳҳои қобили қабул ва мусоидат ба ҳалли мушкилоти сангини энергетикии Тоҷикистон мебошад». 

 Бо назардошти иштироки ширкатҳо ва коршиносони муътабари ҷаҳонӣ дар ташхиси лоиҳаи бунёди нерўгоҳи Роғун, изҳори боварӣ карда шуд, ки натиҷаи кори онҳо ба баҳсу мунозираи кишварҳои минтақа атрофи ин мавзўъ хотима мегузорад.

 Рафти ташхиси техникӣ-иқтисодии лоиҳаи бунёди хатти баландшиддати барқии КАСА – 1000 низ аз мавзўъҳои сўҳбат буд.

 Таваҷҷўҳи зиёд ба дастгирии рушди иҷтимоию иқтисодии Тоҷикистон, аз ҷумла дар шароити болоравии нархи маҳсулоти нафтӣ ва озуқаворӣ зоҳир карда шуд.

Зикр гардид, ки аз ҷониби Бонки ҷаҳонӣ ба Тоҷикистон ду грант ҷудо карда мешавад, ки яке ба дастгирии буҷети давлатӣ ва дувумӣ ба соҳаҳои кишоварзӣ, маорифу тандурустӣ ва ҳифзи иҷтимоии аҳолии ниёзманд равона хоҳад шуд.