Дар маросими ботантана гурӯҳи аввали 44-нафараи ҷавонон аз шаҳри Конибодом ба хизмати ҳарбӣ дар Қувваҳои Мусаллаҳи ҷумҳурӣ сафарбар карда шуданд.

Дар суҳбат бо хабарнигори ОИ «Азия-Плюс комиссари шаҳри Конибодом Рустам Исроилов изҳор кард, ки ин дафъа маросими гусели ботантана на дар назди бинои комиссариати ҳарбӣ, балки дар пояи Муҷассамаи ёдбуди шаҳидони Ҷанги Бузурги Ватанӣ бо иштироки беш аз 2 ҳазор сокинони шаҳр – роҳбарони мақомоти маҳаллии ҳокимияти давлатӣ, собиқадорони ҷангу меҳнат, хизматчиёни ҳарбии интернатсионалист, иштирокчиёни ҷангҳо барои барқароркунии сохти конститутсионӣ, хизматчиёни ҳарбии дар садамаи нерӯгоҳи атомии Чернобил иштирокдошта, сарбозони қисмҳои низомии мустақар дар минтақа, намояндагони аҳли ҷомеа ва ҷавонон доир гардид.

Ба гуфтаи Исроилов, дар даъвати тирамоҳӣ 188 нафар ба хизмати ҳарбӣ фиристода шуда, дар даъвати баҳорӣ 227 нафар зодагони Конибодом ба хизмати ҳарбӣ сафарбар мешаванд.

«Ояндаи наздик боз 30 нафар ҷавонон курсҳои ронандагӣ дар мактаби намунавии техникии Ҷамъияти мусоидат ба мудофиаро хатм намуда, онҳо низ ба хизмати ҳарбӣ даъват мешаванд», - иброз дошт комиссари ҳарбии шаҳр.

Номбурда афзуд, айни замон дар сафи Қувваҳои Мусаллаҳи Тоҷикистон ҳудуди 1 ҳзор нафар ҷавонон аз Конибодом адои хизмат мекунанд.