Ҳукумати Тоҷикистон дар бораи ташкили истироҳати кӯдакону наврасон дар соли ҷорӣ қарор қабул кард.

Ба сохторҳои марбута ҷиҳати то охири моҳи май ба охир расонидани корҳои сохтмону таъмир ва муҷаҳҳаз гардонидани иншоот дар макони истироҳати кӯдакону наврасон дастур дода шудааст.

Гуфта мешавад, ба ифтитоҳи истироҳатгоҳҳо танҳо бар асоси хулосаи мақомоти санитарӣ-эпидемиологӣ ва сӯхторнишонӣ иҷоза дода мешавад.

Супориш дода мешавад, ки барои ташкили истироҳати тобистонаи кӯдакону наврасон аз буҷети суғуртаи иҷтимоӣ ва нафақа маблағ ҷудо карда шавад.

Ҳамчунин ба андешидани тадбирҳои зарурӣ оид ба ташкили истироҳатгоҳҳои корӣ ва таълимӣ бо истифода аз дигар сарчашмаҳо ишора мешавад.

Вазорати тандурустӣ ба таъмини истироҳатгоҳу макони тафреҳ бо мутахассисони зарурии тиббӣ, назорати вазъияти санитарӣ гигиении истироҳатгоҳҳо ва Хадамоти алоқа ба таъмини иртиботи доимии телефонӣ бо ҷойҳои истироҳат ва солимгардонии кӯдакону наврасон уҳдадор шуданд.

Ба Федератсияи мустақили иттифоқҳои касаба аз ҳисоби маблағҳои буҷет харидани роҳхатҳо ба кӯдакони ятиму бесарпараст ва кӯдакон аз оилаҳои камбизоат, аз ҷумла кӯдакони дар таъминоти давлат қарордошта дар мактаб-интернатҳо, инчунин кӯдакони лаёқатманд ва фарзандони кормандони бахши кишоварзӣ тавсия дода шудааст.

Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед. 

Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.