Дар соли гузашта беш аз 80 ҳазор муҳоҷир бо далели нақзи қоидаҳои будубоши муҳоҷират аз Русия маҷбуран ихроҷ карда шуданд. Дар ин бора хабаргузории "ТАСС" бо такя ба мақомоти ин кишвар иттилоъ додааст.

Ин теъдод қариб як баробар бештар аз соли 2023 аст. Дар ин сол беш аз 44,2 ҳазор шаҳрванди хориҷӣ ва шахсони бешаҳрванд аз 60 кишвар аз Русия ихроҷ шуда буданд.

Дар соли 2022 бошад 26,6 ҳазор муҳоҷир ва шахсони бешаҳрванд аз Русия ихроҷ гардида буданд.

Қаблан як намояндаи аз Додгоҳи Русия ба "ТАСС" гуфта буд, ки "аз соли 2017 то соли 2022 ҳудуди 200 ҳазор муҳоҷир барои нақзи қонуни муҳоҷират азин кишвар ихроҷ шудаанд".

Ба гуфтаи манбаъ, ихроҷи иҷбории муҳоҷирон тибқи қарори додгоҳ сурат гирифтааст. Маълум нест, ки муҳоҷирони ихроҷшуда шаҳрвандони кадом кишвар буданд.

Аксаран муҳоҷирони корӣ аз кишварҳои Осиёи Марказӣ, аз ҷумла Тоҷикистону Ӯзбекистон барои таъмини рӯзгори худ ба Русиямераванд. Онҳо соли гузашта беш аз ҳарвақта аз сӯи мақомоти ин кишвар зери таъқибу фишор қарор гирифтанд.

Ёдрас мешавем, ки чанде пеш расонаҳои Русия хабар дода буданд, ки дар соли 2024-ум 18 ҳазор муҳоҷир аз шаҳри Маскав ихроҷ карда шудаанд, ки аксари онҳо шаҳрвандони Тоҷикистону Ӯзбекистон ва Қирғизистон будаанд.

Бояд гуфт, пас аз ҳодисаи "Крокус" дар Маскав фишору таъқиб ва боздошту ихроҷи муҳоҷирон дар Русия афзуд. Маҳз баъди ин ҳодиса мақомоти Русия ба маҳдуд кардани ҳуқуқи муҳоҷирон дар ин кишвар оғоз карданд. 

Аз ҷумла давоми гузашта дар беш аз 10 минтақаи Русия корҳои гуногун барои муҳоҷиронро манъ карда, қонунҳои дигари ин кишварро пурзӯр карданд.

Соли 2025 барои муҳоҷироне, ки нияти кору зиндагӣ дар Русияро доранд, тағйироти зиёд мешавад. Шурӯъ аз ҳамин сол муҳоҷирони ғайриқонунӣ зери назорати қатъӣ хоҳанд буд, бинобар ин риояи ҳама қоидаҳои нав муҳим аст. Ин қоидаҳо кадомҳоянд? Дар ин мавод талош кардем, ки онҳоро муфассал шарҳ диҳем.

Дар Telegram, Facebook ва Instagram бо мо бимонед.