Тақдими хона ба як оилаи дигари тоҷик дар шаҳри Качканари вилояти Свердлов, ки шаҳрвандии Русияро дорад, бори дигар баҳси тақдими хона ба “муҳоҷирони шаҳрвандигирифта”-ро доғ кард.

Ин дуввумин ҳодисаест, ки тақдими манзили истиқоматӣ ба зодагони Тоҷикистон дар Русия баҳсбарангез мешавад. Аввали моҳи январ дар шаҳри Митиши ба Таҳмина Самадова хона доданд, аммо дар пайи фишори ҷомеа ва миллатгароҳо онро дубора гирифта, нисбати ин зодаи Тоҷикистон парванда боз карданд.

Оилаи Мирсаидовҳо, ки соҳиби 4 фарзанданд, беш аз 10 сол пеш ба Русия рафта, чанде пеш бар асоси барномаи давлатӣ, соҳиби хона шудааст. Дар пайи нашри ин хабар, намояндагони гурӯҳҳои миллатгарои Русия дар гурӯҳҳои Телеграм навиштаанд, ки дар ин шаҳр “ҳадди аққал 20 хонаводаи камбизоат ҳастанд, ки ҳар кадом соҳиби 10-13 фарзанд мебошанд, аммо муҳоҷире, ки ба наздикӣ шаҳрвандии Русияро гирифтааст, соҳиби хона гардидааст”.

Ба иттилои ҳукумати маҳаллӣ, хонаводаи Масаидовҳо, ки чаҳор фарзандро тарбия мекунанд, тамоми меъёрҳои гирифтани шаҳодатномаро пурра иҷро кардаанд. Мақомот таъкид кардаанд, ки ҳеҷ асосе барои рад кардани ин ҳақи онҳо вуҷуд надорад. Гуфта мешавад, ки Акрам Масаидов 32-сола буда, соли 2014 ба Русия рафтааст.

Аммо гурӯҳҳои миллатгарои Русия навиштаанд, Акрам Масаидов аз соли 2019 барои гирифтани шаҳодатномаи манзил барои оилаҳои камбизоат дар навбат будааст. Ҳамагӣ 67 хонаводаҳои камбизоат барои гирифтани манзил худро сабт кардаанд ва Акрам дар ин рӯйхат дар ҷойи 59-ум қарор доштааст.

Ин тасмим дар миёни сокинони маҳаллӣ низ вокунишҳои мухталифро ба бор овардааст. Онҳо эътироз кардаанд, ки “чаро ба номзаде, ки бумии Русия нест дар навбати аввал манзил додаанд” ва онҳо, ки “даҳсолаҳо мешавад, ки дар ин ҷо зиндагӣ мекунанд, дар интизори навбат ҳастанд”.

Ҳоло маълум нест, ки тақдири оилаи Акрам Масаидовҳо баъди фишори ҷомеа  ва гуруҳҳои миллатгароҳои Русия бо чӣ меанҷомад.

Оилаи Таҳмина Самадова

Бояд гуфт, ки дар соли ҷорӣ маротибаи дуввум аст, ки тақдими манзили истиқоматӣ ба зодагони Тоҷикистон дар Русия баҳсбарангез мешавад. Аввали моҳи январ дар шаҳри Митиши, наздикии Маскав, ба Таҳмина Самадова, хонаводаи дигари зодаи Тоҷикистон сертификати манзили арзишаш 24 миллион рублро тақдим карданд. Ин хонавода соҳиби 7 фарзанд буданд, ки шиносномаи Русияро доштанд.

Баъдан мақомоти Русия дар пайи фишори ҷомеа ва миллатгароҳо хонаи истиқоматиро аз хонаводаи Таҳмина Самадова ва ҳамсараш Рамазон Раҳимов гирифта, онҳоро ба тақаллубкорӣ муттаҳам карданд.

Мақомот охири моҳи январ Таҳмина Самадоваро боздошт карданд, аммо баъдтар бо шарти тарк накарданим ҷойи истиқомат озод намуданд. Дар пайванд ба ин ҳодиса муовини раиси шаҳри Митиши низ дастгир шуд. Ӯ ба ин айбдор шудааст, ки дар раванди тасдиқ маълумот дар бораи даромад ва аъзоёни оилаи зодаи Тоҷикистонро дуруст насанҷидааст. Гӯё Самадова даромади шавҳарашро кам нишон додааст.

Мувоффиқи иттилои Вазорати корҳои дохилии Русия танҳо дар соли 2023 87 ҳазор тоҷикистонӣ шаҳрвандии Русияро гирифтаанд.

Коршиносон ба ин назаранд, ки доштани шиносномаи Русия барои муҳоҷирон кафолати таъмини саддарсадаи ҳуқуқу озодиҳои онҳо дар ин кишвар нест. Мақомоти ин кишвар ҳар лаҳза метавонанд бо баҳонаи кӯчак шиносномаи зодаи дигар кишварҳоро бекор кунанд.

Дар Telegram, Facebook ва Instagram бо мо бимонед.