Дар соли 2023 ҳаққи пардохти моҳонаи кӯдакистон ё боғчаҳои давлатӣ дар шаҳри Душанбе боз 8 сомонӣ қимат шудааст: акнун аҳолӣ ба ҷои 128 сомонии қаблӣ 136 сомонӣ пардохт мекунанд. Дар ин бора аз Сарраёсати маорифи шаҳри Душанбе ба “Азия-Плюс” хабар доданд.

Манбаъ, боло рафтани ҳаққи моҳонаи кӯдакистонҳоро ба афзоиши ҳаҷми нишондиҳанда барои ҳисобҳо, ки дар соли 2023 аз 64 ба 68 сомонӣ афзоиш ёфт, рабт дод.

Бо ишора ба он ки нишондиҳанда барои ҳисобҳо дар тамоми кишвар баланд мешавад, эҳтимол нархи боғчаҳо низ дар тамоми Тоҷикистон афзоиш ёфтааст.

“Сар аз 1-уми январ нархи ҳаққи моҳонаи нигоҳубини кӯдакон дар боғчаҳои давлатӣ боло рафта, дар ҳаҷми 68 сомонӣ муқарра гардидааст, ки ду нишондиҳандаро барои ҳисобҳо дар як моҳ 136 сомонӣ муқарар кардааст”, - гуфт манбаъи мо аз сарраёсат.

Бояд гуфт, ки пардохти маблағ аз ҷониби волидон тавассути БДА «Амонатбонк» суприда шуда, танҳо расиди он ба муассисаҳои таълимӣ дастрас карда мешавад.

Саҳифаи фейсбукии Сарраёсати маорифи Душанбе

Хотиррасон мекунем, ки соли гузашта низ бархе  волидайнн ба “Азия-Плюс” шикоят карданд, ки нархи ҳаққи моҳонаи нигоҳубини кӯдакон дар боғчаҳои давлатӣ боло рафтааст ва масъулони  ин боғчаҳо ба ҷойи 120 сомонии пешин, ҳоло 130 ва ҳатто 140-150 талаб мекунанд.

Ин аст, ки Сарраёсати маорифи шаҳри Душанбе аз сокинон хоҳиш намудааст, ки дар ҳолати аз ҷониби масъулони муассисаҳои таълимми пойтахт  талаб намудани маблағи бештар, ба телефони боварии ин ниҳод 2213092 тамос бигиранд ва ба почтаи электронии [email protected] муроҷиат намоянд.

Дар ин ниҳод гуфта буданд, ки дар сурати исбот гардидани зиёд талаб намудани хаққи моҳона, масъулони кӯдакистонҳоро бо мақомоти ҳифзи ҳуқуқ ҷазо медиҳанд.

Аммо пештар низ дар шабакаҳои иҷтимоӣ волидон аз боло рафтани ҳаққи нигоҳубини кӯдакон дар боғчаҳо нигаронӣ намуданд ва бархеи онҳо мегӯянд, ки онҳо маблағи бештаре пардохт мекунанд.

Ёдовар мешавем, ки солҳои гузашта низ нархи ҳаққи моҳонаи нигоҳубини кӯдакон дар боғчаҳои давлатӣ ба миқдори 8 сомонӣ зиёд гардида буд, ки бо қарори ҳукумат маблағи пардохти кӯдакистон аз 120 сомонии соли 2021, соли 2022 –юм 128 сомонӣ афзоиш ёфта буд.

Дар Telegram, Facebook, Instagram, OK ва ВК бо мо бимонед.