Аз 10 то 21-уми октябри соли 2022 дар қаламрави Тоҷикистон бо нерӯҳои дастаҷамъии истиқрори сареъи минтақаи Осиёи Марказӣ тамриноти муштараки “Сарҳад-2022” баргузор мешавад, хабар медиҳад маркази матбуоти СААД.
Дар ҷараёни тамрин тайёрӣ ва гузаронидани амалиёти ҷангӣ аз ҷониби ВКД ҶТ оид ба нест кардани гурӯҳҳои мусаллаҳи ғайриқонунӣ, ки ба қаламрави як кишвари узви СААД ворид шудаанд, таҷриба карда мешавад.
Марҳилаи фаъоли тамринот дар тамрингоҳи "Ҳарбмайдон" аз 17 то 21-уми октябр баргузор мешавад.
Теъдоди умумии ширкаткунандагони тамринҳо дар Тоҷикистон ҳудуди 1000 нафар буда, дар рафти он беш аз 300 воҳиди таҷҳизоти низомӣ ва вижа, ҳавопаймо, чархболҳо ва дигар таҷҳизоти низомӣ низ ҷалб мешаванд.
Дар ҳамин ҳол, Қирғизистон аз иштирок дар тамринҳои СААД "Сарҳад-2022" дар Тоҷикистон, худдорӣ кардааст. Дар ин бора хабаргузориҳои ин кишвар бо такя ба дафтари матбуоти вазорати дифоъи Қирғизистон хабар медиҳанд.
Қаблан ҳам вазорати мудофиаи Қирғизистон эълон карда буд, размоиши низомии СААД, ки мебоист таҳти унвони "Бародарии шикастнопазир - 2022" аз 10 то 14-уми октябр дар он кишвар баргузор шавад, бекор карда шуд.
Вазорати мудофиа далели бекор шудани баргузории размоиши низомиро нагуфт.
Бояд гуфт, ки нерӯҳои посдори сулҳи СААД аллакай дар Қазоқистон силсилаи тамринҳои худро бо номи "Муомила-2022" ва "Ҷустуҷӯ-2022" анҷом доданд. Он замон гуфта шуд, ки сарбозон, аз ҷумла низомиёни Русия ва Белорус ба Қирғизистон мераванд, аммо баъдан гуфта шуд, ки онҳо ба ватани худ бармегарданд.
Руcский