Дар ҷараёни сафари расмии раиси палатаи болоии парлумони Тоҷикистон ва шаҳрдори Душанбе Рустами Эмомалӣ ба Ҷумҳурии мардумии Чин дар маҷмӯъ 11 санади нави ҳамкорӣ ба имзо расид, хабар медиҳад сомонаи расмии Маҷлиси намояндагони Маҷлиси Олии Тоҷикистон.
Аз ҷумла санадҳои зерин имзо шуданд:
— Созишнома оид ба ҳамкорӣ байни Маҷлиси миллии Маҷлиси Олии Ҷумҳурии Тоҷикистон ва Маҷлиси умумичинии намояндагони халқии Ҷумҳурии Мардумии Чин;
— Ёддошти тафоҳум оид ба дӯстӣ ва ҳамкорӣ байни мақомоти иҷроияи ҳокимияти давлатии шаҳри Душанбе ва шаҳри Пекин;
— Ёддошти тафоҳум оид ба ҳамкории тиҷоратию иқтисодӣ ва фарҳангии байни мақомоти иҷроияи ҳокимияти давлатии шаҳри Душанбе ва ҳукумати мардумии шаҳри Ханҷоу;
— Лоиҳаи номаи табодулӣ оид ба ҷудо намудани кумаки молиявии Чин дар ҳаҷми 2 млн доллар барои сохтмони толори маҷлисгоҳ дар Маҷмааи ҳукумати Ҷумҳурии Тоҷикистон;
— Лоиҳаи номаи табодулӣ оид ба таҳқиқи қаблии техникии лоиҳаи «Шаҳри ҳушманд» (Smart city)-и шаҳри Душанбе;
— лоиҳаи номаи табодулӣ дар бораи сохтмону азнавсозии роҳ ва 4 эстакадаҳои нав дар пойтахт, таъмиру азнавсозии гузаргоҳи сарҳадии Тоҷикистону Чин «Кулма-Қаросу», азнавсозӣ ва сохтмони қитъаи роҳ аз деҳаи Варшези ноҳияи Шуғнони ВМКБ то гузаргоҳи сарҳадии Тоҷикистону Чин «Кулма-Қаросу»;
— Санади супоридан ва қабули воситаҳои нақлиёти коммуналию сохтмонӣ, ки ба таври ройгон, ҳамчун кумак аз ҷониби Ҳукумати Ҷумҳурии Мардумии Чин ба Ҳукумати Ҷумҳурии Тоҷикистон пешниҳод шудааст.
Ҳамчунин дар доираи сафари Рустами Эмомалӣ ба Чин санадҳои ҳамкорӣ байни бахши хусусии Чин ва Тоҷикистон ба имзо расиданд, ки маблағи умумии онҳо зиёда аз 400 млн долларро ташкил медиҳад.
Рустами Эмомалӣ, шаҳрдори Душанбе ва раиси Маҷлиси миллии Маҷлиси Олии Тоҷикистон дар ҷараёни сафар ба Чин дар Донишгоҳи забон ва фарҳанги Пекин нимпайкараи Абӯабдуллоҳ Рӯдакиро ифтитоҳ ва суханронӣ кард.
Дар шаҳри Ханҷоу Рустами Эмомалӣ аз Осорхонаи Бозиҳои Осиё боздид намуд. Бозиҳои 19-уми тобистонаи Осиё аз 23 сентябр то 8 октябри соли 2023 дар шаҳри дар ҳамин шаҳр доир мегарданд.
Руcский