Дар ҷараёни брифинги Созмони ҷаҳонии тандурустӣ (СҶТ) роҳбари ҳайати Созмон дар Тоҷикистон Патрик О.Коннор оид ба натиҷаҳои кори он изҳор дошт, ки ба вазъияти бадтари паҳншавии коронавирус омода шудан лозим аст.

“Тоҷикистон ба марҳилаи паҳншавии коронавирус дар ҷумҳурӣ ворид шуда, дар муддати ҳар се рӯз тамоюли ду баробар афзудани шумори сироятёфтагон ба назар мерасад”, - хабар дод ӯ.

Вай афзуд, ки авҷи беморӣ ҳоло дар пеш буда, шумори беморон рӯз то рӯз зиёд мешавад.

“Чораҳои пайгирӣ, инчунин карантин / ҷудо нигоҳдории алоқаҳои имконпазири шахсони сироятёфтаро пешбинӣ карда, мувофиқи имкон равуо дар шаҳрро маҳдуд сохтан лозим аст”, - тавсия дод О.Коннор.

Намояндагони СҶТ тавсия доданд, ки имконоти озмоишгоҳҳо афзуда, шумори ҳарчи бештари одамон аз тест гузаронида шаванд, зеро ҳамагӣ як озмоишгоҳ барои Тоҷикистон нокофист.

“Дар Тоҷикистон айни замон 44 ҳазор тест аз Русия, Чин ва Олмон оварда шудааст. То имрӯз 7700 нафар аз тест гузаронида шуданд”, - хабар дод муовини вазири тандурустӣ ва ҳифзи иҷтимоии аҳолии Тоҷикистон Саида Ғайрат.

Муовини дигари вазири тандурустии ҷумҳурӣ Шодихон Ҷамшед дар навбати худ қайд кард, ки барои беҳтар шудани ошкорсозии коронавирус ба ҷуз тест, томографияи компютерӣ ва ташхиси хун низ ҳатмӣ мебошад.

Дар посух ба суоли “Азия-Плюс”, ки “оё ба омори Вазорати тандурустӣ ва ҳифзи иҷтимоии аҳолии Тоҷикистон бовар мекунед?”, намояндаи СҶТ чунин посух дод:

“Маълумот пеш аз расидан ба вазорати тандурустӣ, аз якчанд сатҳ мегузарад. Вазъият хеле зуд тағйир меёбад, вале маълумоти оморӣ имкон дорад, ки саривақт пешниҳод нашавад”.

Ҳамчунин зикр шуд, ки иттилооти омори мардумӣ дар бораи марги одамон ба гумони коронавирус дар сомонаи kvtj.info омӯхта мешавад.

Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед. 

Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.