Теъдоди хориҷиёне, ки аз уҳдаи супоридани имтиҳон аз забони русӣ, таърих ва асосҳои қонунгузории Русия барои дарёфти иҷозатномаи кор ё иқомат дар ин кишвар баромада натавонистанд, дар давраи аз моҳи январ то моҳи май қариб 10 баробар зиёд шуд. Дар ин бора ба ТАСС аз дафтари матбуоти Вазорати маориф ва илми ин кишвар хабар додаанд.
Дар Вазорат зикр кардаанд, ки чунин ҳолат бинобар сабаби таваҷҷуҳи бештар ба расмиёти супоридани имтиҳонҳо рӯйи кор омадааст.
“Ҳоло ҳам дар тамоми қаламрави Русия барои супурдани имтиҳон имкон ҳаст. Дар ҳамин ҳол, сатҳи риояи расмиёти қабули имтиҳон боло рафта, фоизи афроде, ки имтиҳонро супорида натавонистанд, аз моҳи январ то моҳи май, қариб 10 баробар афзуд”, - омадааст дар хабар.
Бино ба маълумоти Вазорат, айни замон дар Русия муҳоҷирон дар 129 ҷой имтиҳон супурда метавонанд, ки 41-то он дар назди ВКД Русия, 87-тоаш - дар назди мактабҳои олии федералӣ ва минтақавӣ ва боз 1-то дигар - дар назди таҳкилоти минтақавии давлатӣ амал мекунанд.
Дар Вазорати маориф ва илм хотиррасон кардаанд, ки аз 1 май ба ташкилотҳои тиҷоратӣ баргузор намудани имтиҳонҳо барои хориҷиён ва додани гувоҳнома (сертификат) ба онҳо манъ шудааст.
Қаблан Рособрнадзор (Мақомоти назорат дар соҳаи маориф) ба чанде аз муассисаҳои таҳсилоти олӣ дар робита ба баргузории имтиҳонҳо аз забони русӣ ҳушдор дода буд. Ба онҳо ҷиҳати роҳ надодани қонуншиканӣ дар самти риоя нашудани талаботи асосӣ ба имтиҳонҳо хотиррасон шуд.
Руcский