Зимни мулоқоти вазири молияи Тоҷикистон Файзиддин Қаҳҳорзода бо намояндаи доимии Бонки осиёии рушд (БОР) дар ҷумҳурӣ хонум Шэнни Кэмпбелл Нақшаи тиҷоратии амалиётии БОР дар кишвар барои солҳои 2022-2024 баррасӣ шуд.

Бино ба иттилои котиботи Вазорати молияи ҶТ, дар доираи Нақшаи болозикр татбиқи лоиҳаҳои муштараки сармоягузорӣ дар соҳаҳои энергетика, нақлиёт, маориф ва илм, тандурустӣ, амнияти озуқаворӣ, ҳифзи муҳити зист, идоракунии давлатӣ ва ғайра пешбинӣ мегардад.

Гуфта мешавад, дар давраи татбиқи “Нақшаи тиҷоратии амалиётӣ дар кишвар” ҷалби маблағҳои грантии БОР дар ҳаҷми 462 млн доллари амрикоӣ дар назар дошта шудааст.

Бонки осиёии рушд яке аз бузургтарин мададрасонони молиявии Тоҷикистон ба шумор меравад, ки шурӯъ аз соли 1998 ба ҷумҳурӣ ҳудуди 2,2 млрд доллар, аз ҷумла 1,6 млрд доллар ба сифати грант ҷудо кардааст.

Дар соли хурӯҷи сирояти коронавируси 2020 ин ниҳоди молиявӣ ба Тоҷикистон дар асоси бебозгашт 320 млн доллар ҷудо кард, ҳарчанд мутобиқи нақшаи индикативӣ дастгирии молиявӣ ба маблағи 120 млн доллар дар назар буд.

Бастаи кумакҳо ба Тоҷикистон дар соли гузашта аз лоиҳаҳо дар соҳаи нақлиёт, бахши кишоварзӣ ва захираҳои табиӣ, идоракунии сохтори давлатӣ, маорифу энергетика, инчунин ёрии таъҷилӣ барои муқовимат бо пандемияи коронавируси нав иборат буд.

Шурӯъ аз соли 2018 Тоҷикистон аз БОР танҳо бар асоси бебозгашт кумак дастрас мекунад. То ин вақт давоми солҳои 2015-2017 кумак тариқи 50/50, яъне 50% - қарз ва 50% - грант расонида мешуд.

Пурра гузаштан ба грантро намояндагони БОР чунин маънидод карданд, ки уҳдадориҳои нави молиявӣ сандуқи қарзии бе ин ҳам зиёди Тоҷикистонро душвортар мегардонанд.

Бо ҳамин сабаб пештар низ - аз соли 2008 то соли 2015 Тоҷикистон аз ин ниҳод маблағгузории бебозгашт дастрас мекард.

Кумаки Бонки осиёии рушд ба Тоҷикистон дар давраи солҳои 1998-2019

Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед. 

Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.