Агентии назорати маводи нашъаовар (АНМН)-и назди президенти ҶТ даст доштани кормандони Агентӣ дар марги Шамсиддин Зайдуллоеви 25-сола , сокини пойтахтро рад мекунад.

Дар посухи расмии АНМН дар ин робита чунин зикр мегардад:

«Рӯзҳои 20-21 апрел дар сомонаҳои Тоҷикистон дар бораи марги боздоштшуда Шамсиддин Зайдуллоев дар тавқифгоҳи муваққатии Агентӣ гӯё бар асари лату кӯб ва шиканҷа маълумот интишор шуд, ки ин маълумоти носанҷида аз қавли модари боздоштшуда вокуниши носолим дар ҷомеа ба бор оварда, ҳолати воқеъиро таҳриф намуд.

Нимаи рӯзи 12 апрел вазъи З.Шамсиддинов, ки барои фурӯши маводи муххадир боздошт ва дар тавқифгоҳи мувақкатии АНМН нигоҳ дошта мешуд, бад шуда, навбатдорони Агентӣ «Ёрии таъҷилии тиббӣ»-ро даъват намуданд. Автомашинаи «Ёрии таъҷилии тиббӣ» баъди 20 дақиқа ҳозир шуда, пас аз муоина табибон изҳор намуданд, ки боздоштшуда қаблан маводи мухаддир истеъмол намуда, бо ин сабаб дардаш (ломка) хурӯҷ кардааст. Сипас ӯро ба Дармонгоҳи ҷумҳуриявии табобати бемориҳои нашъамандӣ мебаранд ва дар он ҷо ба Зайдуллоев ду соат тариқи сӯзан (капелнитса) дору мегузаронанд.

Баъдан ӯро ба истгоҳи «Ёрии таъҷилӣ» бурда, дар он ҷо ӯ қотеъона аз муоина ва табобат даст мекашад ва дар ин бора хаттӣ дастхат ҳам менависад. Тақрибан соатҳои 23-15 ӯро ба боз ба Агентӣ оварда, соати 5-и субҳ посбонон хабар медиҳанд, ки вазъи Зайдуллоев ногаҳон хеле бад шудааст. Навбатдор фавран «Ёрии таъҷилии тиббӣ»-ро даъват намуда, табибон аз норасоии кори дил фавтидани ӯро тасдиқ мекунанд.

Дар бораи ин ҳодиса фавран мақомоти прокуратура ва корҳои дохилии ноҳияи Фирдавсӣ огаҳ шуда, кормандони ин мақомот ҳамроҳ бо коршиноси судиву тиббӣ ҷасади Зайдуллоевро муоина карданд. Дар протоколи навиштаи онҳо қайд шудааст, ки «аломатҳои берунаи марги маҷбурӣ ошкор нагардидааст». Ин гувоҳи он аст, ки далели рафтори бераҳмонаи кормандони Агентӣ дар ин ҳодиса ҷой надорад. Ғайр аз ин, дар тамоми биноҳои Агентӣ камераҳои мушоҳидаи видеойӣ гузошта шудаанд ва ҳамаи ҳодисаву рӯйдодҳои дар он рухдода шабонарӯзӣ сабт мешаванд.

Зимни тафтишот Зайдуллоев баёнот дод, ки тахминан аз моҳи декбари соли 2013 ӯ ба истеъмоли маводи мухаддири героин тариқи роҳҳои нафас (ингалятсионӣ) оғоз намуда, модараш изҳор намуд, ки якуним сол қабл писараш дар дармонгоҳи ҷумҳуриявии нашъамандӣ табобат гирифтааст.

Маркази ҷумҳуриявии дармонгоҳи нашъамандӣ дар бораи дар қайди онҳо будани Зайдуллоев маълумотномаи расмӣ дод. Бевосита пас аз боздошт Ш.Зайдуллоев дар Маркази ҷумҳуриявии нашъамандӣ аз муоина гузаронида шуда, бемории «истеъмоли воситахои нашъаовари гурӯҳи афюн»-и ӯ тасдиқ шуд.

Рӯзноманигорони маводро таҳиянамуда натиҷаҳои ташхиси тиббии расмиро интизор нашуда, ба муайян кардани «ташхиси беморӣ» ба шитобкорӣ роҳ доданд, ки ин дар навбати худ ҷомеаро ба гумроҳӣ андохт».