Ширкати “Сафед-Дара”  дар дар ҳамвории “Поялна Москвина”, ки дар ноҳияи Лахш (собиқ Ҷиргатол) воқеъ аст, пойгоҳ (лагер)-и кӯҳнавардӣ месозад.

Тавре ба “Азия-Плюс” директори генералии ҶСП “Сафед-Дара” Баҳодур Исҳоқов хабар дод, пойгоҳ барои кӯҳнавардон дар баландии зиёда аз 4 ҳазор метр аз сатҳи баҳр ба ҳамаи меъёрҳои байнулмилалӣ ҷавобгӯ ва аз соли оянда ба қабули меҳмонон оғоз мекунад.

Ҷойи сохтмон байни кӯҳнавардон хеле маъруф аст, зеро дар ин ҷо ду қулла - “Қуллаи Исмоли Сомонӣ” (Коммунизм) - баландиаш 7495 метр ва “Қуллаи Озодӣ” (Корженевский) - баландиаш 7105 метр ҷойгиранд.

Фармоишгари лоиҳа ширкати “Сафед-Дара” ва паймонкори анҷоми корҳои сохтмон ҶСП “Қуллаҳои тоҷик” мебошанд.

Ба гуфтаи Баҳодур Исҳоқов сохтмони пойгоҳ дар ҳамвории “Пояна Москвина” хеле бузургмиқёс ва гарон хоҳад буд, лекин аз арзиши лоиҳа маълумот дода нашуд.

Зимнан зикр шуд, дар ин ҳамворӣ замони шӯравӣ пойгоҳи кӯҳнавардӣ сохта шуда, лекин тӯли солҳои тӯлонӣ он кӯҳнаву фарсуда ва айни замон дар ҳолати на он қадр хуб қарор дорад

“Пойгоҳи нав каме дуртар аз пойгоҳи аввал сохта мешавад, - иброз дошт ӯ. - Ҳамзамон дар фурудгоҳи ноҳияи Ҷиргатол корҳои таъмир ҷараён мегиранд, ки аз моҳи июл то моҳи сентябр барои интиқоли кӯҳнавардон ба пойгоҳ истифода бурда мешавад. Вақти парвоз бо чархбол аз ин фурудгоҳ то пойгоз 30 дақиқа вақтро мегирад. Шояд оянда барои харидории чархбол низ зарурат пайдо шавад”.

Зимнан зикр шуд, ки барои мутобиқшавии кӯҳнавардон ба муҳит ва обуҳаво 4-5 рӯз лозим аст, аз ин рӯ, пойгоҳ бояд бо тамоми шароитҳои будубош таъмин бошад.

1/2

“Дар пойгоҳ бинои маъмурӣ, ошхона, ҳаммом (ҷойи оббозӣ), чор ҳуҷраи иқомату хоб барои дар як вақт ҷой додан ба 100 нафар, бунгоҳи тиббӣ, маҷлисгоҳ, ҳуҷраҳои машғулият бунёд мегардад”, - қайд кард директори ширкат.

Директори “Сафед-Дара” ҳамчунин зикр кард, ки иқлими ин мавзеъ сард буда, бинобар ин, ҳамаи бино ва ҳуҷраҳои пойгоҳ бо барқ аз панелҳои офтобӣ ва генераторҳои дизелӣ, инчунин генераторҳои бодӣ (шамолӣ) ва низоми гармидиҳӣ аз дегҳо таъмин хоҳад шуд.

Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед. 

Дар Telegram, Facebook, Instagram, Viber, Яндекс.ДзенOK ва Google Новости бо мо бимонед.