Низоми интиқоли гармӣ дар Душанбе то 1-уми апрел фаъолият карда, ба эҳтимоли зиёд, пас аз он мавсими гармидиҳӣ ба хонаҳои сокинон қатъ хоҳад шуд. Дар ин бора имрӯз, 13-уми март, Сиҷоуддин Саломзода, муовини раиси шаҳри Душанбе ба “Азия-Плюс” иттилоъ дод.

Ба гуфтаи ӯ, дар шаҳрдории Душанбе то ба ҳол ягон қароре дар бораи санаи дақиқи қатъ шудани интиқоли гармидиҳӣ қабул нашудааст, вале “тибқи нақша интиқоли гармӣ аз 10-уми октябри соли 2022 шурӯъ шуда, то 1-уми апрели соли 2023 идома хоҳад кард”.

Дар ҳамин ҳол, чанде аз сокинони пойтахт иддао карданд, ки шаби гузашта интиқоли гармӣ дар хонаҳояшон қатъ гардид.

Дар робита ба ин Сиҷоуддин Саломзода гуфт, ки “кӣ хомӯш кардааст ва бо кадом сабаб маълум нест, вале низоми гармидиҳӣ ҳоло фаъол хоҳад монд”.

Зимистони имсол низоми гармидиҳии шаҳри Душанбе бо сард омадани ҳаво бо мушкил мувоҷеҳ шуд. Низоми гармидиҳии пойтахт аз 14-уми октябр ба кор шурӯъ намуда, дар моҳи декабр, бо аввалин сардиҳо дар кишвар кораш камранг гашт.

Сокинони пойтахт тайи ду моҳ - декабри соли 2022 ва январи соли равон аз вазъи низоми гармидиҳӣ нигаронӣ намуда, аз хонаҳои сардашон паёпай шикоят мекарданд. Он вақт масъулин қисман мушкилро эътироф карда, зимистони сард ва мушкили норасоии маводи сӯхтро баҳона пеш оварда буданд.

Дар Telegram, Facebook, Instagram, OK ва ВК бо мо бимонед.