Садҳо донишҷӯи Донишгоҳи давлатии Хуҷанд ба номи Бобоҷон Ғафуров барои таҷлили ҷашни асосии Наврӯз, ки имсол дар шаҳри Хуҷанд баргузор мешавад, ба роҳпаймоӣ ё “маршировка” ҷалб шудаанд. Ин бар хилофи таъкиди Эмомалӣ Раҳмон, раиси ҷумҳури Тоҷикистон аст, ки гуфта буд, хонандагонро ба пешвозгирии мансабдорони давлатӣ ва ба корҳои берун аз таҳсил набароранд.

Чорабинии асосии ҷашни Наврӯз имсол, дар шаҳри Хуҷанд мегузарад, аммо санаи баргузории он дақиқ нест.

Дар назар аст, ки дар он Эмомалӣ Раҳмон, раиси ҷумҳури Тоҷикистон бо ҳамтоёни худаш аз Қирғизистону Ӯзбекистон ширкат мекунад. Аз ин лиҳоз, барои пешвози меҳмонону баргузории ҷашн барои онҳо, дар Хуҷанд раҳпаймоӣ идома дорад.

Райҳпаймоӣ даҳсолаҳо ин ҷониб дар Тоҷикистон баргузор шуда, дар он асосан донишҷӯёну хонандагон ҷалб мешавад. Ин иқдом ҳамеша аз сӯйи ҷомеа интиқод шудааст.

Аз ҷумла, Эмомалӣ Раҳмон дар мулоқоти худ бо аҳли маориф дар Рӯзи дониш аз ҷалби хонандагону донишҷӯён ба корҳои берун аз таҳсил, аз ҷумла тамринҳои идона ва бурдани донишҷӯёну хонандагон ба пешвозгирии мансабдорони давлатӣ интиқод кард.

“Дар шаҳру ноҳияҳо фалонча омадааст, тамоми мактабро бароварда қади роҳба рост кун. Ҳатто барои сафарҳои президент накунед ин корҳоро... Кӯдаконро мебароред дар сари роҳ рост мемонед, чӣ гуноҳ доранд бечораҳо. Чӣ, президент надидааст кӯдаку хонандаро. Соатҳои дароз, дар ҳавои хунук, шамол, барф, борон. Бо ҳамин зоҳирпарастӣ мекунед, ба чашми президент хок пошиданӣ мешавед. Ман ин корро манъ кардам, боз мебинам. Накунед ин корро!”, - гуфта буд.

Вале бар хилофи таъкиди раиси ҷумҳур, имсол низ донишҷӯёни чанд  донишгоҳи шаҳри Хуҷанд шурӯъ аз нимаҳои моҳи феврал барои таҷлили ҷашни Наврӯз ба корҳои берун аз дарсӣ ҷалб шудаанд.

Чанде аз донишҷӯёни ДДХ ба номи Бобоҷон Ғафуров бидуни зикри ном гуфтанд, ки онҳоро маҷбуран барои омодагӣ ба ҷашни Наврӯз ба тамрин мебаранд ва “танҳо духтарони навхонадор озоданд”.

 

Акси марбута
Акс аз сомонаи t-news.tj

Аз Вазорати фарҳанги кишвар ба “Азия-Плюс” гуфтанд, онҳо барои таъмини гурӯҳҳои ҳунарӣ масъуланд ва ҷалби донишҷӯёнро ба раҳпаймоӣ шарҳ надоданд.

Аз Раёсати маорифи вилоят гуфтанд, дар ин бора бидуни иҷозатномаи ҳукумат иттилоъ намедиҳанд.

“Аввал аз ҳукумати вилоят иҷоза гиред ва баъд чанд соат хоҳед бо шумо суҳбат мекунем”, - гуфтанд аз ин ниҳод.

Аз хадамоти матбуотии раиси вилояти Суғд дар суҳбат бо “Азия-Плюс” гуфтанд, “ин гапҳоро гуфтан мумкин нест, баъзе масъалаҳои амниятӣ ҳастанд, ки гуфтанашон мумкин нест” ва гӯширо хомӯш карданд.

Аммо ба иттилои дарёфтаи “Азия-Плюс” беш аз 14 ҳазор донишҷӯ ва хонандагони макотиби миёнаву олии Хуҷанд ба раҳпаймоӣ ҷалб шудаанд.

Баҳси ҷалби донишҷӯён ба тамринҳои идона ва пешвозгирии раисҷумҳур, вазирону раисон чандин сол аст, ки дар ҷомеаи Тоҷикистон баррасӣ мегардад. Донишҷӯёну хонандагон ҳар сол даъво мекунанд, ки онҳоро иҷборан ба тамрин мебаранд ва дар ҳолати саркашӣ кардан, бо хориҷ кардан аз донишгоҳу мушкил дар супоридани санҷишу имтиҳонот таҳдид мекунанд. Масъулини Вазорати маориф бошад, ҷалби донишҷӯён ба “маршировка”-ро амали маъмулӣ ва афзояндаи ҳисси ватандӯстии ҷавонон меҳисобанд. Аз ҷумла, Имомзода Муҳаммадюсуф вазири пешини маориф кишвар гуфта буд, ки “аз як чизи хасакӣ ин қадар проблема насозед”.

Дар мавриди ҳуқуқҳои донишҷӯёну хонандагон барои иштирок дар тамринҳои идона дар маводи Азия-Плюс: Маршировкаҳо дар Тоҷикистон: агар донишҷӯён ба машқҳо маҷбурӣ ҷалб шаванд, чӣ кор карда метавонанд? мутолиа кунед.

Дар Telegram, Facebook ва Instagram бо мо бимонед.