Агентии омори Тоҷикистон аз ҳисоботи моҳонаи худ “Вазъи иҷтимоӣ-иқтисодии ҶТ” гӯшаи сайёҳиро хориҷ кардааст. Акнун мо чӣ гуна дар бораи амалишавии барномаи давлатӣ маълумот дармеёбем?
Гӯшаи сайёҳӣ дар ҳисобот моҳи июни ҳамин сол пайдо шуда, чаро он айни замон ихтисор шудааст, номаълум аст.
Қаблан ВАО-и Тоҷикистон чандин маротиба рақамҳоро дар бораи боздиди шумори сайёҳон аз Тоҷикистон зери шубҳа гузошта буданд.
Бо фармони президенти мамлакат солҳои 2019-2021 дар Тоҷикистон “Солҳои рушди деҳот, сайёҳӣ ва ҳунарҳои мардумӣ” эълон шудаанд.
Охири моҳи апрели соли равон роҳбари Кумитаи рушди сайёҳӣ Нуъмон Абдуғаффорзода ба вакилони палатаи поёнии парлумони ҷумҳурӣ хабар дод, ки танҳо давоми се моҳи соли ҷорӣ 215 ҳазор нафар сайёҳони хориҷӣ ба Тоҷикистон омадаанд.
Нимаи тобистон Агентии омор дар ҳисоботаш зикр кард, ки нимсолаи аввали соли равон 604,2 ҳазор нафар шаҳрвандони хориҷӣ бо мақсадҳои гуногун аз Тоҷикистон боздид кардаанд.
Шумори назарраси шаҳрвандони хориҷӣ - 524,8 ҳазор нафар (86,9% аз шумори умумӣ) бо корҳои шахсӣ ва ҳамагӣ 23,7 ҳазор нафар (3,9%) бо мақсади сайру саёҳат аз Тоҷикистон боздид кардаанд.
Вале аллакай баъд аз чанде Агентии омор қайд кард (аллакай на дар ҳисобот, балки шифоҳӣ ба рӯзноманигорон), ки қариб ҳамаи хориҷиёни ба Тоҷикистон меомада сайёҳон буда, шумори умумии онҳо дар нимсолаи аввал на 23 ҳазор, балки 604 ҳазор нафарро ташкил додааст.
Баъдан раиси Кумитаи рушди сайёҳӣ ба журналистон шарҳ дод, ки мувофиқи ақидаи роиҷ дар арсаи байнулмилалӣ, ҳамаи касоне, ки ба ҷуз корёбӣ, ба дигар кишвар ё аз ҷойи иқомати доимӣ ба макони дигари ватан бо ҳама гуна мақсад ба муҳлати на камтар аз 24 соат мераванд, сайёҳ шуморида мешаванд.
“Ҳама гуна шахсе, ки ба ин гуна сафарҳо меравад, хоҳ нохоҳ аз хизматрасонии бахши сайёҳӣ истифода мекунад: исифодаи меҳмонхона, хариди туҳфаҳо дар мағоза, тамошои макони истироҳат, мероси таърихӣ, боғҳо ва ғайра”, - гуфт Нуъмон Абдуғаффорзода.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
Руcский